الفرق بين المراكضة والملاحقة


بسم الله الرحمن الرحيم
السلام عليكم ورحمة الله يآحلى قرووووب
من زمان مشتركة معاكم بس كونت اراقب عن بعد والحين صحيت
حبيت تشاركونا معاناة طالبات الحاسب ,,طبعا محد درى عنا

منذ بدأت الدراسة وبدأ معها الكرف والكريف بعد
ماكان التسدح شغلتنا الشغولة ايام الصيف
نبدأ جاهزين ..

لقطات على الطاير من يومياتنا:
نفز من احلى نومة 5 وعليها الفجر
ونلبس وكلن تضف على وسيلة مواصلاتها سيارة ولا باص




في تمام الثامنة يبدا برنامج الملاحقة
وهو عبارة عن : منذ دخولك للمحاضرة تلاحق الدكتورة ماتدري تفهم الشرح ولا تكتب لك نوت وهينتات
والبنوتات عليهم اشكال خطيرة اللي تنعس وتتثاوب واللي ماتدري وش تكتب
واللي تقلب السلايد ضايعه
واللي تقز الرايح والجاي << مثلي
وعلى هذا الحال حتى ينتهي الدوام وغالبا ينتهي العصر ( حسب المحاضرات طبعا)
ونرجع لبيوتنا مفهمين ومسبهين وما نسوى ريالين
نغفو كم ساعه وحنا نفكر ونخطط متى يمدينا نذاكر ونحل الشيتات والتمارين
ملحوظه على الطاير.. طبعا كل بنات القسم همهم المعدل ,, تموت ولا تنقص ربع ههههه

نرجع للقصة ..

بعد الغفوة يبدا برنامج آخر يسمى
المراكضة
وهو انك تركض وتسابق الوقت وتذاكر وتحل لجمع اكبر كم من الدرجات
وعلى هذا الركض الين الفجر
( المحظوظه وبقوة اللي تنام هذي نسميها طيارة لانها خلصت بسرعه
بتقولون ريحو في الويك اند
طيب اصبروا بيجيكم العلم
تضيع علينا نهاية الاسبوع في بحوث ومشاريع وكلام من ده
احلمي تطلعين مع اهلك للسوق او عروس او مناسبات حتى الزيارات العائلة نتخلف عنه
بصراحه سمعت عن احتكار الافكار لكن ما صدقت الين شفته بالجامعه
يعني تشرح لك الدكتورة الموضوع رؤوس اقلام
والفكرة يعني كيف تتسوى هذا انتي تبحثين عنه
بالعربي الفصيح :
دبري نفسك
طيب بتقولون دورو في النت
؟

الجواب :
انسى تلقى المطلوب بحذافيره فيه
ممكن تلقى حاجة بسيطة والاغلب مافيش حاقة
وتستمر هذه المراكضة حتى انتهاء ليلة السبت ( اي يوم الجمعه )
ليستانف نهار السبت الملاحقة وهكذ

بإختصار..
الفرق بينهم من منظوري الخاص
المراكضة : تركض لنفسك لتنجز ماعليك من واجبات ومسؤليات
اما
الملاحقة : تلاحق الدكاترة والمحاضرات واكمال نواقص محاضراتك

السؤال ماهي المشكلة ؟؟
كل البربسة اللي فوق ومافهمتو

لب المشكلة اكتراث الدكاترة بالحشو وزيادة المنهج دون قياس مستوى فهم الطالبات ومدى استيعابهم
يحملنا جهد اكبر للفهم اولاً ثم البحث عن ما هو مطلوب منا من بحوث ومشاريع
مثلا .. في احسن الاحوال يتعدى المنهج 21 شابتر
وحنا بنات طماعين نبي معدلات مرتفعه
من المسؤل عن المشكلة
هل تقصير من الطالبات ام من الدكاترة بكثر المناهج و الكتب ؟؟؟

انتظر تعليقاتكم

لكم مني كل الود
الاضافة رجاءً ممنوعه


تعليقات 27

  1. صادقة والله ياعمري لا كله كوم والدكاترة كوم ثاني عشان البنات اشطر يعطوهم دروس اكثر طيب ارحمونا ياهوووو وليت الدرجات على قد المجهود بس ……

  2. ياقلبي عليك انا نفسك حاسب وحآسه بمعاناتك 🙁 الله يخارجنا ويعدي دراستنا على خير يسلمو ياعسل موضوعك مرررررررررررة نايس:$ تحياتي

  3. ليست هذه معاناتك بس هذي معنات الكثر بل اجزم ان 80 % من الطلبه معتمدين على الله ثم على البحث الذاتي ……… ومعاناتي اني طالب في الجامعه ونفس التخصص IT جامعه AUOA بالعربي الدكتور رتوش فقط وانت الله لا يهينك علىك الباقي نت ………… كفي …. مقهى …. مكتبه بكيفك ………… معنه المفروض ان هذا القسم يجهز له ورش عمل واقسام لصيانه بس ما عندك احد الله يسهل بس واتخرج وبعدها يحلها الف حلات ……………. تحياتي

  4. معليييييش نراكض ونلاحق وكلش بس نلقى نتيجه بالاخير 🙁 الحمد لله على كل حال 😀

  5. انا طالبة حااسب أول سنه … الله يخارجنا بس القسم مو حلو والدكاتره مهم متعاونيني والحمدلله على كل حاال المهم نخرج بنتيجه حلووه.. مشكوره اختي لطرحك هذه المعاناه ليواسي بعضنا الاخر .. استغفر الله

  6. انا شخصيا الحمدلله ماعمري دخلت اي من الجامعات السعوديه وبعد توفيق الله وامتنانه علي ادرس في جامعه امريكيه وتحدثت مع الكثير من الشباب من هم تخرجو من جامعات سعوديه وشافو الجامعات الامريكيه وانظمتها وتعليقا على كلامك من ناحية التشابترات للكتب بصراحه 21 في ترم مره كثيره. أكثر كتاب شفته بحياتي خلال دراستي الجامعيه 17 تشابتر وصحيح كان الكورس مقرف بس على الأقل فيه شوية fun الله يوفقنا ويوفقكم ويعينكم ويصبركم وموضوع قيم شكرا لك

  7. أنا متخرجة حاسب(من الرياض) بس من قرن :D:D ما صدق للحين الوضع على ما هو علييه B سؤال : للحين تاخذون مواد مع بنات العلوم، وانتوا يزيدون عليكم واجبات؟؟ ولما تستغربون تقول الدكتوره: الله انتو بنات حااااسب !!!!! 🙂 ايش يعني احنا عباقرة والا إيش؟؟ وإلا للحين مانعين عنكم أستاذات الإقتصاد و المحاسبة الزينات بحجة إنهم شاكين فيهم لأنهم لما درسوا بنات الحاسب كلهم نجحوا و كثير جابوا A وللحين يدرسكم السلم رجال(عن طريق تلفزيونات خلاص مالها قطع غيار، الا ان كان تدورون في المتاحف) وكل واحد مألفله كتاب مليون صفحة و يدخله في المنهج؟؟ و بنات عليشة يدرسونهم دكتورات يلخصون لهم الملازم؟! أسأل زيادة وإلا خلاص؟َ:D تصدقون إغتثيت كأن هذا صايرلي أمس

  8. هههههههههه قلبتي المواااااجع اذكر المغص وقت الـ لاب .. وكل ما فرحتي انك خلصتي يطلع لك ايرور .. والتحطيم من الاستاذات .. شلون بتكملون بالقسم وانتم مافهمتوا هذا .. ومن هالحكي .. الحمدلله .. انا درست سنة و حولت قسم ثاني .. لان الشهاده باعلقها بالمطبخ سواء IT ,,,ولا قسم ثاني هع الله يوفق الجميع ..

  9. أممم بصرآحهـ هذآ أول موضوع أعلق عليهـ من بعد إشترآكي في قروب بونوآف . ومدري ليهـ أخذني الحمآآس في الرد ع هيكـ موضوع .. امممم انا ما رديت إلآ إني شفت فيهـ تشآبهـ كبير وكبير جدآآآ بيننآآ وبينكم .. وأعتقد بمآ إن حنآ متشآبهين في موقعين مختلفين وفي كليتين مختلفتين .. فأعتقد جميع الكليآت في المملكهـ تنهج هالطريقهـ .. للأسف الدكتور يدخل علينآآآ وهو أصلآ حآط في رآسهـ إنهـ يخلص العدد الفلآني من السلآيدآت .. يعني وربي شئ يقهر .. نآآدرآآ من الدكآترهـ اللي يرآعي ( شعور الفهم ) من الطآلب .. اهم شئ كمية اللي خلصهـ مع الطلبهـ .. وللأسف مآ فيهـ مرآعآة لشئ إسمهـ فهم وربي شئ يقهر .. وكم دكتور عندنآ تكلموآ عن هالشئ وإن عندنآ بالمملكهـ والعالم العربي يتبعون وينهجون هالنهج … حتى في المدآرس ولآزم إن المدرس يخلص المقرر بغض النظر عن الفهم .. شئ وربي يقهر .. واللي يآكلهآ الطآلب لمن يروح البيت ويتوهق بعدد المذكرات اللي اخذها في غضون ايام قليلهـ .. ومن جد متى الواحد يلآقي وقت يخلصهم ومتى يلآقي وقت لنفسهـ .. شئ أليم نعآني منهـ من أول مآ دخلنا الجآمعهـ ( college of clinical pharmacy ) .. لكن مآ نقول الا اللهـ المستعآن واللهـ يرزقنآ سرعة الفهم ومطآردة الدكآترة ومسآبق الوقت

  10. قلبتي المواجــــــــع انا طبعاً قسم حاسب سنة تحضيري بجامعه الأمااااااااام …… والله كرف مو طبيعي ع الأقل سنة تحضيري يكون فيها مراعاة والله من كوز إلى كوز وإلا تجيكــ الدكتورة معصبة ويله اختبار من 10 وانا طبعاً فاهيه ولا ذاكرت وتطير الدرجات بالهبل :(:( وطبعاً الحين مأساة math تجينا الأستاذة تقول بنات انا اسفه هذا آخر يوم لي وآخر محاظرة B وطيب mid term تيتشر تقول دبروا عمركم مع الوكيلة حنان اخضر هاااااااااااااا وملاحق الوكيلة مقفله مكتبها ومدري شو ….. آخر شئ تأجل بعد العيد بأسبوعين وتقول مافيه دكتورة تجيكم اقعدوا فاضيين والمنهج يتراكم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ تدرين اليوم رجعت من الجامعه واذن العصر قسم بالله دووووووووووووووخه وعندي شيتات lap cs001 ألله يعين بس ربنـــــــــا يوفقكم ،، سوري ع الأطالة 🙂

  11. ابد كلنانفس المعاناة .. انا في قسم ادب اللغة الانجليزية ومعاناتنا تكمن انوو مافي اساسا شي نذاكر منه غير النوت الي احنا نكتبها وفوق كل هذا مطالبين اننا نحضر واحنا صامين المحاضرة الي بناخذهاولو حصل وغبنا عن محاضرة شوفوا حالتنا كيف تصير وتبصمين بالعشرة انك مستحيل تفهمين المحاضرة الي فاتتك..ربنا يعين ويسهل ويوفق .. ياا ربّ

  12. في الزمن الماضي …. كان الرجل يسافر من المدينه المنوره الي الكوفه الكي يتحقق من مسئله …………………ز الله المستعان علي هذا الزمان

  13. :$ههههههههههههه انا بصراحه درست بعليشه سنه علم اجتماع يوم شفت المطرسه تركتها ورجعت بعدهابسنه قلت يمكن تحسنت الاوضاع ولقيتها اردى وقلت وليه وجع الراس اخرتهابعلقها في المطبخ على ما قالت منحاشه من الحاسب

  14. كذا بالضبط هذي المشكله كلام كثير ومافيه مرجع ولا شي ولمن تجي الاسئله في الاختبار اول مره نسمع فيها ويقولون انهم قالوه بالشرح طيب وين المرجع الي نذاكر منه ولا ايش ؟ حشي وقصص وخايالات وكلام كثير ليه طيب وين التخطيط والتقسيم والشرح الواضح مدري على ايش طلعو دكاتره صراحه انا عندي المعيدات ارحم بمليون مره من الدكاتره الله يسهل على الجميع ويوفقنا ونتخرج قبل لا يطلع لنا الشيب منهم ومن تعليمهم شاكره لك موضوعك

  15. كلنا في الحاسب هواء سواء بالتربية أو بالجامعة > لأني منها ، والبنوته اللي بسنة تحضيري تبين الجد يوم كنت تحضيري أول كان من زود الفلة نخلي يوم أووف كانت عندنا استاذة توها متزوجة:) والثانية نصرفها ،، ويوم رجعت اللي متزوجة انكسرت رجل الثانية فصرنا نصرف المتزوجة ولا تجي :$:$:$:$ .. والحين جايبين لنا وحدة تدرس اسم انها ماخذه ماستر واصلا الماستر في فرع دراسة معلومات وحنا ندرس فرع برمجة وممسكينها لنا وأنواع الاغلاااط صرنا نصحح لها :(:(:( وأنواع الخسووووفات في الميدات :(:( والإسبوع اللي فرحانين فيه حق العيد كلن ذاب لنا فيه مشروع أو شيت أو أو أو :(:( يعني بنذاكر ونحل واجباتنا أو بنفهم اللي راح أو نشوف الميدات اللي عندنا بعد العيد أو نرتاح شوي كإجازة لنا أو نعيد مع اناس ..؟؟!! ياااارب فرجها

  16. 😀 كلوو نفر سيم سيم انتا مدام علوم حاسب الخرج وصلوا مستوى 5 ! و محد منهم يعرف يكتب كود كامل والسبب؟ مستر نغميش اللي كل امله بالحياة.. ازاي اخلص طشبطرز كتير بالترم دهـ..تخيلوا 18 تشبتر في ترم واحد.. و اول ترم ناخذ فيه برمجه لا وبلغة C يعني خلك حمار جميل تجي ابربر عليك يا طالب وانافخ عليك واحطمك.. لان نفسيتي ماش.. عشاني بعيد عن عيالي والحق يقال انه بعد ما الدخيل مسكّه الجادّة.. عرف قدر نفسه ..بس مازال مستلعن الى الترم الماضي.. و هالترم كأنه اشوى شوي.. اصلا مو على اساس انت داخل حاسب فمعناته انت تفهم اكثر من البروفيسور.. على فكرة!! هذي تيمبلت لجميع كليات الحاسب.. و عليك حساب حجم المتخرجين اللي مايدبرون شي

  17. الله يعين الجميع انا طالب حاسب بكلية المعلمين 😀 ((طبعاً الكل الحين بيناظرني بأستحقار هاه هههه 8) )) لكن تراها صعبه برضو عندنا دكتور ربض يدخل ويملي السبوره ويمسح ويملي ويمسح والطلاب يقولون له دكتور ارجوك خلاااص 🙁 وهو يقول لااا لسااا لين يخلص كل الساعتين تبعه B الله يكتب الي فيه الخير ويوفق الجميع في أمان الله

  18. احسست من بعض المصطلحات انكِ بنفس جامعتي صراحة تواجهنا نفس المشكلة لان التعليم عندنا اساسا ( مفتوووووووح ) وتحتها مليون خط يعني اعتماد شبه رئيسي على الطالب ويا ليل ما أطولك طالب مو مخلص ركض وملاحقة !! جميع مواد البرمجة التي درسناها تسير على نفس المبدأ ! انا على ابواب التخرج ولا اذكر اننا دخلنا مرة لاب في الجامعة وطبقنا عملي في البرمجة الا ما رحم ربي ، كل الاعتماد على الطالب يطبق في البيت على كيف كيفه >>> الله يعين الطالب وش بيفهمه طلاسم وخزعبلات وخاصة الكودات اللي محد يشك انها طلاسم هيروغليفية !!! معاناة والحمد لله على كل حال .. فالخلاصة هذه طبيعة الدراسة المفتوحة ولعلها تعود بالنفع على الطالب الذي اعتمد على نفسه في كل صغيرة وكبيرة .. والله المستعان

  19. آولا ,, لكم كل الشكر والتقدير على التفاعل الذي لم آكن اتوقعه لانها تعتبر لي المشاركة الاولى في المجموعه 😮 ثآنيا ,, ما راح آقدر ارد على كل الردود بس اللي فيها نقطة او سؤال آجاوب او اعلق عليها فلا حد يشره علي تراني زولة :$ حلم التخرج .. ليست المشكلة في البحث الذاتي ولكن ضيق الوقت وكثرة التزامات المواد من مشاريع وشيتات غير الكويزات صاير وقتنا مرة زحمة هذا طبعا غير الوقت الكبير اللي مفروض نتفرغ له لمشروع التخرج 🙁 الجريح .. الدراسة في السعودية مع آحترامي تعبانه وطايح حظها رغم كل محاولات التعليم العالي بالنهوض بالجامعات حتى تصبح مثل الجامعات الاجنبية ، اما على حكاية الكَم من المناهج اليوم امتحنا ميد ترم اول 8 شابترات لمادة دسمة جدآ تخوض في السكيورتي وامن المعلومات 🙁 خريجة قديمة .. كل شي على ماهو عليه حتى جملة انتو بنات حاسب نفسها < يختي آحس هالجملة مصدّية ولا زالت الشبكات حتى السلم ، كل شي سالتي عنه لسى موجود منحاشه من الحاسب .. يختي تكفين الله يرحم والديك لا عاد تقولين نعلقها بالمطبخ آكره هالجملة قولي آعلقها في السيب او في الحوش آنشاالله على علبة صندوق البريد اللي عند الباب الخارجي هع :$ فواز العتيبي ..هذي المشكلة كم كبير وبدون فهم وشو هالكم لكن الشكوى على الله مدري متى بيطورون التعليم عندنا :~ سنة تحضيري حاسب .. جد آزمة آحس محد حاس فينا ، اما بخصوص الماث شفنا فيلم امس لاطفال يابانيين يحسبون مجموعه كبيرة من الارقام العشرية في مدري كم ثانية وحنا الله يخلف مغير بذا الالات الحاسبة والقواميس الناطقة في الامتحانات ، جد مرة عيب 🙁 فاغر .. هههه اسفط على جنب قصم بالله آحلى شي في الدنيا الفغارة تحس آنك كووووول :$ آروح كشنة 😀 هع مي .. جامعه الملك سعود تخصص IT آخر سنة باذن الله 🙁 نمسه .. وبعدين يا عالم وش قصتكم مع هالمطبخ يختي سويلنا فنجانين شاهي عشان آقدر اتفاهم معك :$ سارة .. مو كل المعيدات عندهم سالفة حرام بالله انه بعضهم ماتعرف كوعها من بوعها وكل ما قلنا شي قالو معليش سلكولها جديدة :$ وحنا اللي رحنا فيها :$ ثالث حاسب .. تعالو آجل صرفو دكتوراتنا هههه ،، الله يوفق الجميع zozi .. طيب واللي مستوى سابع وما تدبر شي بلغة مشروع تخرجها (asp.net ) وش تقول عنها ؟؟؟ 🙁 M i K o .. لا محد يستحقر آحد كولنا في الهوا سوآ ,, سلملي على دكتورك وياخي انقز امسح بداله يمكن يدفك بالدرجات :$

  20. طالبة IT في الـ AOU فرع الكويت .. لا انا بالسعودية بالرياض تحديدا آجل شكلك مثلي ما اطيق البرمجة بس ربي يعين الجميع آن شاء الله وتتخرجي بمعدل عالي امنياتي لكي بالتوفيق 🙂

  21. سلام عليكم ,, طبعا كل الجامعات كرف بس بمرح يعني تنبسط وانت تكرف فيها,, بس عندنا هنا لا تدرون ليه ,, لأن الدكتور او الدكتوره ماعليه حسيب ولا رقيب العميد او الوكيل او رئيس القسم لاهي في الحلى والتمر والقهوه والسواليف مع الدكاتره الباقين,, عشان كذا دكتور ماعليه منك او دكتوره اذا ماعنده ضمير وطبعا ياكثرهم الأيام ذي,, يعني اذا مافي مسؤول عنده ضمير ويقول هذا مستقبل طلاب وطالبات لازم اتابعه,, الدكتور او الدكتوره بيسرح ويمرح في الطلاب, وعذره انا دكتور درست واخذت شهاده لازم املي عليكم وانتم تسوون., بس والله ان البنات مسكينات رايحين فيها اكثر من العيال والله,, بس ما اقول الا الله يوفق بناتنا دنيا وآخره وشبابنا والله يوفقني واتخرج,,, عذرا على الأطاله,,

  22. حنا طايحين سواليف وقهوة الروس الكبيرة وحنا ملخومين بالمناهج وطلباتهم 🙁 صدق كلامك دراسة برا متعه اشوف اهلي لما يحكون لي عن دراستهم 🙁 الله يوفقك ويوفقنا جميعآ ويرفع حظنا وحظك دنيآ وآخرة 🙂

  23. انا طالب بـ كلية العماره و التخطيط بـ جامعة الملك فيصل بالدمام و تخيلوا صار لي اسبوع ما شفت اهلي إلا مره وحده يوم الخميس بسسسسسس أطلع من البيت من الصباح الباكر و ما ارجع إلا الصباح الباكر بعد B و الله ان هالدكاتره ما يخافون الله لا وعندنا طلعه جديده اللي هي سماحة الشيخ الدكتور بيسافر بعد إجازة العيد بـفتره بسيطه و قال لنا ان المحاظرات بتتدبل اوقاتها ،،،،يعني احنا محصلين شي من اول علشان تدبل المحاظرات ياجعل كبدك تتدبل الله يعين الله يعين ، ، مالنا إلا الصبر و الاحتساب

  24. ربي يوفقك ويعينك ,, لازم يصير بيت الشعر هذآ تشجيع لنآ ,, ومن لم يذق مر التعلم ساعة .. تجرع ذل الجهل طول حيآته وفقنا الله واياكم وزادنا وزادكم علما ونورآ 🙂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الفرق بين المراكضة والملاحقة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول