العراجين ،، وأحلى مقلقل لعيونكم


صباحكـمـ \ مساؤكـــمـ .. قشطة وعسل
حيالله قروب ابو نواف كلن بأسمه
 أشك انتس يابعدهم متنكر بفستان

…………………………………….

هذي اول مشاركة لي بالقروب واتمنى انها تعجبكم
تعريف العراجين : شي ابيض يطلع من الارض واذا لقيته تطب من السياره وهي تمشي  وله عدة طرق للطبخ
^
^
اتحداكم اذا فهمتوا شي
جبت لكم بعض الصور للعراجين من تصويري الشخصي
المكان : بعد مصنع تمور المملكه بـ 10 كيلو يعني عند مفرق دهيما
الشكل الاول العرجون المفلقع ـ

الشكل الثاني العرجون اللي يويدز هههههههههههه

الشكل الثالث العرجون اللي يترزز

وهذي صوره جماعية للعراجين


نجي الحين لطبخ العرجين
العراجين له طرق طبخ كثيره
يا مع الكبسه او مقلقل او نشويه على النار
جبت لكم طريقه العراجين مع المقلقل
اول شي نجهز العراجين اللي نبي نطبخهم

وبعدين ننظفهم زين عن التراب

ونقطعهم قطع صغيره

وبعدين نجهز طماط وبصل وفلفل رومي وثوم وشوي صلصه وملح وفلفل اسود وزيت ولحم او دجاج << ليه الدجاج سمك ؟؟

نقطع البصل ونحمره بالزيت

نحط اللحم والملح والفلفل الاسود والثوم والصلصه والعراجين ونخليهم ربع ساعه

وبعدين نحط الطمام والفلفل الرومي

والنتيجـــــــه:ـ

بالعافيه على قلوبكم


الطريقه الثانيه للطبخ هي الشوي بالنار
اذا جمرت النار نحط العرجون بالرمل الحار اللي تحت الجمر (المله)ـ

وبعدين نغطيه من فوق بالرمل والجمر

 وبعد ربع ساعه الى نص ساعه  نطلعه  بس لازم تتأكدون انه مستوي (اضغطوه بأصابعكم واذا حسيتوا انه لين معناته استوى)ـ

نظفوه زين عن التراب
وبالعافيه على قلوبكم
ملاحظه \ محدثتكم ماتاكل العراجين بس تطبخهن لاخوانه المشافيح
مايستفاد من اللي فوق:ـ
ــ لاتطب من السياره وهي تمشي بسبب عرجون مفلقع
ــ لاتقول عرجون عرجون للي يسوقبكم واذا وقف تقول له تحت الكرتووووووووون لانه يبي يمسجرك بالعقال
ــ لاتشوي العرجون بالسكين واذا حصل وشويت غب السكين عن امك
ــ اذا جاك شي من اكل العراجين تراي موب مسؤوله ^_*ـ
اتمنى اكون خفيفه عليكم واستمتعتوا معي
واللي صادف كلمه صعبه ويبي معناه يروح لاقرب قصمنجي يترجمه له

تحياتي لكم
بنـــت البدائع


تعليقات 78

  1. اول شي صورة العراجين مع بعض مررررره حلوه شكلهم اصحاب من زمان ثاني شي معلومت جديد وتسلمي عيها سوال .ايش يعني عراجين؟؟؟؟؟؟

  2. روووووووعه .. والله ماعرفه ولا قد اكلته بس من الصور وخصوصاً صورة الصحن (النتيجة) أحسه شيء ثاني .. بالعافية عليكم إن شاء الله . شكرا لك . لاتشوي العرجون بالسكين واذا حصل وشويت غب السكين عن امك

  3. :$ من بكرا وانا عند مصنع التمور مع اني حاس انكم خلصتوها كلها ههههههههه عليكم بالعافية العرجون نوع من انواع الفطر للي ماقد سمع به بس لاحد يتحمس ويسويه مع البيتزا ايميل رائع وننتظر الجديد منك

  4. انا ابى اعرف العرجون هذ1 وشو .. اللى اعرفه هو الفقع اذا كان نفسه فما اختلف علي شئ غير الاســـم بس اذا كان غيره الله يستر كل شوي طالعلنا شئ من الارض ونبلعه على طووووول ع العموم مشكور

  5. والله فللللللللللللللللة.. العرجون احسن اذا طُبخ كامل .. والمشوي كلاااااام ثاااني

  6. ماشاء الله عليكـ عز الله يالقصمان هالاسبوع عايشين حالة استنفار بطلعة العراجين :$ واللي ماياكل العرجون ولا يعرفه يبي يفوته نص عمره 😮 بس انتبهوا اللي مايعرفونه لا يلقطون فسوة العجوز :$ الله يعطيك العافية 😀

  7. يا اختي مع احترامي الشديد لموضوعك إلا انك جبتي العيد أولا ً العرجون لا يؤكل ، ومن يأكله يعتبر مذموم عند أهل البادية وخصوصا ً نجد الذي يؤكل الــكمأة ولها اسماء عاميه ( الكمي ، الزبيدي ، ألخ ) بينما العرجون يسمى بأسم ( فـــســـ…….. العجوز ) باقي حرفين ماكتبتهم في القوس استغرب والله الردود التي لا تعرف هذا الشيء واذا مو مصدقتني ياليت تشاورين احد كبار السن ويعلمك عن هذا الأمر والله ماش ياجيل النيدو ماتعرفون اللي يؤكل ولا يؤكل 8)

  8. موضوع رائع جدا ومميز بس ترى ماعرفت العراجين شكل الطويلة منها يصلح حق مضاربة وسلمتي

  9. قبل لا ارد على موضوعك ودي ارد على الاخت الفاهمه والي مسميه نفسها (لاحوووووووووووووووووووووووووول يادي المصيبه) انا متأكد انك ماتفرقين بين الكبسه والهمبرجر ولا كان مارديتي هذا الرد الي يفشل ويدل على ذكائك الخااارق 🙂 بعدين اهل نجد نصفهم ياكلون العراجين وانا منهم واهلي واجدادي.. وابحثي يا ذكية بالقوقل واكتبي عرجون وتعرفين انك وقعتي بغلط كبير راح تحسين عقبه انك تسرعتي:$:$ اول شي اختي بنت البدايع موضوعك هذا توووحفه لعدة اسباب السبب الاول اننا بالرياض انا والاهل لنا شهر نطلع كل اسبوع وندور عن عراجين ولا نلقى ثانيااا حظك انه موضوعك مصور ولو هو مباشر كان نحتناكم ثالثا احلى شي ان زوجتي من البدايع علشان كذا تحمست اكثر لموضوعك وتكفين ارسلي لنا عراجين عن طريق البريد على العموم شكراا على هالموضوع وبالعافيه

  10. بعد الحج انشاللة وانا مسنترعندكم بالبدائع في ظل جدار المصنع ومعي المشب جاهز ابد اللة يحي جميع القروب

  11. 😀 قسمن رووووووووووووعه وتسلم يديك ,,, شغل ميه ميه ياحظ اخوااانك المشافيح والله يخليك لهم سنااافيه ماشاءلله عليك … الحين فترة الغدااا وأنا بالمكتب ومير سعابيلي تتقاااطر :$ ههههههههههه

  12. لاحول يادي المصيبة :$ خوذي لك كورس بالقصيم يكون افضل والله ماش ياجيل النيدو :$افهم من كلامك انك من جيل ماقبل النيدو اهنيك على مستواك كثييير بسنك مايعرفون يفكون الخط وانتي تقرين ايميلاتB واااااااااو انتي توووووووووووووووحفة ياتيته:D

  13. اجل نحوتين اهل البدايع تسلمي موضوع شهي وجاي في وقته والله اشتهيت ددسن موديل 84 ……. افحط به وادور عراجين يالله ولمنا عزبة الكشته مشييييييييييييييييييييييييييييييييييييينا

  14. طارق يسلملي مرورك والعراجين مثل ماقالك اخوي ابو عتب نوع من انواع الفطر ……. طلال الغامدي لازم تذوووقه من كلام اهلي انه حلو 😀 يسلملي مرورك ……. ابو عتب تعال ابيك شوي على جنب عشان محد يسمع ( رح للشبك حق مزرعة النعام اللي على الطريق امس رحنا ولقينا 240 عرجون كلهن بجنب الزفلت يعني مافيه امل يخلصون ) يسلملي مرورك ….. ابو نوره العرجون غير الفقع بس كلهم من انواع الفطر يسلملي مرورك ….. زائره تسلمين حبيبتي على هالطله …. عبدالعزيز يسلملي مرورك خيو …. ام محمد يابعد قلبي ماذقته والا كان اقولك الفرق يسلملي مرورك …. مطلوب عراجين ابشوي مشروع عراجين بروح ألقط العصر وابيع بالليل وفيه توصيل للمنازل ههههههه يسلملي مرورك ….. ولد الرس هههههههههه اول رساوي يقول انه ياكل العراجين كل اللي اعرفهم يقولون نروح نلقطهن ونعطيهم الغنم

  15. أولا :: يسلموو ياجارتنا> من الــرس ,, ع الايميل اللي زي اللوز 😀 ثانيا:: أحـب أرد ع اللي يقول العرجون مــا يـوكل ,, المـثل يقـول >> اللـي مــا يعــرف الـصقــر .. عــمرهـ مــا عــرفه فســ… العجوز< تختلف تمـامـا عن العرجون ,, وأنـا اللـي أقــولك إسـآل شيبــآنك ويـعلـمــونك .. بـصــراحه اللي مــا عرف العرجــون يســأل عنه ويجــربه> حشيش مب عرجون :$ >> أخلص علينــا >> خـــلاص خـلصت .. تـقـبلي مــرووـري 8)

  16. هههههههههههههههههه البنت فالتها بزياده مع العراجين بس دمها خفيف مشكوره على الموضوع والصور الحلوه ونتطلع للجديد 🙂

  17. شكلها في الصور بالذات الجماعية ما يحفز بس وهي في الصحن عجيييييييييبة يا ريت تطلع عندنا في جدة ما يطلع إلا النوع الثاني اللي قالت عليه الأخت (مسوية فيها داهية) على العموم هني

  18. انا اعرف الفطر وبس اول مرة اشوف العرجون بس اللي اعرف ان الفطر مب حرام ياكلونه فاذا العرجون نوع من الفطر فيجوز ان يؤكلـ موضوع حلوووووووووو يعطيج الف عافيه اختي

  19. بصراحه اسلوبك خطير :$ وهذا العرجون اول مره اسمع فيه واول مره اشوفه زين عرفتينا عليه 8) النكته الردود اقسم جلست اضحك عليهم مع اني مدري من الي معه حق من الخرطي هع هع تسلمي قلبووو …

  20. قسم انك فله….والله ياعليهم طعم بعد…يمييييييييييييي ثانكيو على الصور….يالله نبغى الله لايهينك صور فقع..

  21. ياجماعه تصدقون أول مره أسمع بهالشئ علمآ بإن لو أقول إني ساكنتن بالبر ماتصدقون

  22. كفووو يابنيتنا تعيشين وتطبخين بس المفروض دخلتي قرع بالطبخه للتعريف اكثر بطقوس بلاد الدوارات حفظها الله ننتظر جديدك عزيزتي 😀

  23. :D:Dههههههههههه اميل ولا احلى بصراحة كنت متشوق اعرف طريقة طبخه لأنه بصراحة يطلع بديرتنا بكثر وخاصة عند بيتنا :~ وكنا نجمعه حنا البدووو ونبيعه على الحظر اللي يموتون فيه ههههههههههم :~مدري ليه؟؟ ثانكيا = شكرن

  24. واااااااااااااااااو يجنن بصراحه انتس طباخه ماهره ومصورة رهيبه شهيتين عرجون والصورة رقم 16 لو تسوين له اعلان وتبدين تبيعين تسان يصك ماكدونالدز

  25. لحوووووووول كلامك موب صحيح وزي ماقلت (اهل الباديه) يعني اكيد هذا من اعتقاداتهم الخاطئه.. يسلملي مرورك ….. بسمه ههههه ناويه تضاربين شكلك تسلملي طلتك ….. ورق بلوت عندي لك فكره قل لزوجتك بنروح للبدائع لانهم يقولون مسوي دوار جديد ونافوره بنروح نشوفهن واذا جيتوا لايردكم الا مصنع تمور المملكه :$ يسلملي مرورك ….. ابو سلطان حياك اخوي بأي وقت 😀 يسلملي مرورك ….. فيصل هههههههه اجل استاثمتبك 😀 يسلملي مرورك

  26. عبدالله يسلملي مرورك …. ابوعتب يسلملي مرورك الثاني …. عبدالله الدوسري تسلملي طلتك …. ابو سلطان تسلملي طلتك والعرجون وضحناه فوق …. ابرار تسلملي طلتك حبيبتي والعرجون والفقع وضحناهم فوق ….. اخر قصيميه تكفين اذا رحتي مرين بروح معتس 😀 تسلملي طلتك حبيبتي …. احمد ههههههههه تسلملي طلتك خيو ….

  27. وأقول والله مالت على اللي ما يعرفون العراجين ولا يفرقون بينها وبين الفقع .. والله الطريقة رائعة ومرتبة ونظيفة .. تمنيت أني أخو لك عشان استمتع بمذاق الأطباق التراديشينال يم يم يم يم تسلمين يا بنت البدائع ويسلون أهل البدائع كل ابوهم

  28. شهيتيني ياربيه وش اسوي الحين اذبح نفسي وعلى الي تقول فسوه الفسوه بوه شوك اول شي انا عمري مدري كم بس من زمان وانا اعرف العرجون وناكله يالبا مع المطازيز وووه بس والا المرقوق يووووو تحياتي بنت البدايع سلميلي على العراجين واتمنى انك تاكلين عني كم عرجووون والا وصي اطفق واحد من اخوانك ياكل عني وه بس

  29. ووويــن عآيشيــن ذولآ‘آ‘ العرجوون مآيعــرف صدزز أنــكــم محرووميــن أويل قلبـي . مرقوق .. وعرآجيـن .. نصلـه كآملــه .. مآقطــع أجرعــه جررع .. تطعــم بـه بلآهآتـك أوعــك تعلكــه ههههه., تشكرآتـي .. أفنــدم

  30. مسائك سوكر ثانكس على التقرير بطعم العراجين شكلها موووووووت والله بس انا مثلك ما احب آكلها واذا شفتها انط من السياره .. يابنت البدائع اتركوا اللي عند مصنع التمور روحوا للي بعد الآحمديه بعد مزرعة النعام يمكن نقابلك هوونيك:$ .. تسلم يمينك ياعسل

  31. اويلاااااااااااااااه بنت البدايع قصم سعابيلي تقوطر على الكي بورد انا بآآآآآآآآآآآآآآآآآآآآآخر الدنيا بس انا اوريتس بس اجي للقصيم والله ماخلي متسان الا وانا مسنتر بوه انخش جحارت الفريان سي يآآآآآآآآآآآآ

  32. اشو هذا العرجون اول مره اسمع فيه اعرف فيه الفقع وجربته اما العرجون شي غريب وبعدين الحمد الله على النعمه شكله زي الصميل غريب بنت البدائع شكلك زحلتي اليوم ونزلتي الموظوعB ههههههههههههههههههههههههههههههههههههههههههههههههههههههههههههههههههههههههههههههههههههههههههههه:$:$

  33. فعلا الله ما يعرف العراجين – ينطبق عليهم المثل القائل: الي ما يعرف الصقر – هههه ما يفرق بين الصقر والدجاجه

  34. اولاً : العرجون نبات فطري ابيض اللون لامع يحب اكله بعض مرتادي البر حيث يعد من النباتات الفطرية غير السامة. ويقول هواة البر وهواة أكل العرجون بالذات ان تناوله يتم بعدة طرق منها الشواء على لهب الجمر أو السلق حيث تتم اضافة الملح اليه بعد فتحه عقب الشواء . اختي العزيزة بنت البدائع موضوووووعك في قمة الروووووعة انااليوم لقطت عراجين مشكووووووووورة امرة اخرى على الموضوع الجميل

  35. الى مسوين هاي كلاااس بصراحه 1ليش ضايقن خلقكم من الموضوع 2 اذا ماعجبكم ليش تتلقف وترد 3 فكوووووونا من الردود الى تحوم كبودنا طيب انا مابي صحن ممكن ساندويش والببسي انا اشريه من برا8) تشكرات على فتح الشهيه

  36. تحية طيبة العرجون أوالعراجين معروف عندنا في المنطقة الغربية أوالحجازبأسم عش الغراب أو فسوة الحصني بالعاميه ونأكله يمكن لأن الحاجه لم تجعلنا نلجاء إليه ونأكله لاكنه يعتبر بروتيني ومغذي حتي الفقع أو الكمئة لم نأكله في الحجازونأكل جميع الخضروات ألأخري والقوليات والحمدلله كلها نعمه وإللي مايعرف يقول ما أعرف لاكن لايذم نعمة الله التي أنزل لعباده وشكرا للأخت التي نقلت لناهذه المعلومه.

  37. :Dالعرجون احلامافيه اذا قليته مع الحم والفلفل الرومي ياسلام والا مع المريقيق

  38. ياسلام سلم البنت ليز يامع ـلم والله اول م ـره اسم ـع بالع ـراجين أو الع ـرجون ولكن م ـن الم ـعلوم ـات اللي سمعناها من الأخ ـوان نقول لهم م ـشكورين ع التوضيح لا ع ـدمناكم يارب وبنت البدائع يع ـطيك ربي الف ع ـافيه ع الموضوع الأكثر م ـن رائع ولا ع ـدمناك وسلم ـت يم ـناك يارب بس م ـن شكله والله شي وشكله لا يوصف بس 🙁 اشتهيته

  39. مشششششششششكوره بنت البدايع على العراجين8) وصراحه انا اشوف العارجين تطلع داااايــم ببيتنا فيه مزررعه سعنووونه مااااره اشوف فيها عراجين تطلع بس امر من عندها كل يوم ولا اعير لها اي اهتمام < متعوب على اعير :$ .. المهم اني مره سمعت من اميمتي الله يطول بعمره تقول ان ذا النوع ما ينأكل من العراجين وبعضها ينأكل .. بس اني ما اخذت الموضوع بجديه يعني ووشآيل من بالي آكله ههههههههههههه .. بس احس انه تغير رأيي يوم شفت اللحيمات وشكل الطعم جونااااااان :(:( عليكم بالعافيه وان شاء الله اجربه عن قريب :):)8) سوري على الاطاله .... يالله سلاااااااااااام8)8)

  40. يا حبيلتس يا وخيتي تمتلكين خاصية عجيبة تدرين وش هي يا عليك خفة طينة تجيب العافية 😮 لا وأحلى شي بالموضوع كله إنتس من البدايع لآني أنا من البدايع >> بس ما عمري طبيتها :~ لآني ساكنة بمكة الله يعمرها :$ و نسيت أعلق ع الأكل شكله يشهوي ويجنن وإن شاء الله أقول لأمي تسوي لي إياه >> عجازة أفندي 😀 يللا أشوفتس ع خير يا ملا العوافيB

  41. الله مير يجزاك خير على الصوووور وموضوووعك مررررة خطير واحسسسن شي بالعرااجين ع قولتس انتس تنطين من السيارةوتاخذينه… ويعطييك العافيه اختي

  42. والله ابدعتي يا بنت البدايع لكن عندي ملاحظتين 1/ المفروض مثل ما يقولون ( تدسين السم بالعسل) وتحطين مع الطبخة قرع, علشان الناس تطيح بالقرع وتبدا اسعاره ترتفع وتتحقق الخطة القومية للبدائع بنشر القرع في ارجاء العالم. 2/ ياليت تعلمين جدتي شلون تزين المقلقل لأنه ذبحتنا بالمرقوق مع العراجين. امزح…..والله ما قصرتي خير من يمثل ديرتنا(بس عسات من الوسطى) هههه

  43. والله كــــــــــفــــــو هذا فقع ولا انا غلاطان بالعافيه يا بنت البدائع مشكورة على الصـــــــــوة مع السلامه اخوك ابو عوض 8)8)

  44. عبدالمجيد يسلملي مرورك خيو ….. طير الرياض تسلملي طلتك خيو ….. Khosaih هههههههه خلاص بسوي وارسل لك تسلملي طلتك ….. abuali مشكووور ع المروور ….. قلبي يحبكـ الله يعافيك وتسلملي طلتك ….. أزهار ههههههههههه لاتخافين انا مع الحق لان اهلي للحين ماتسمموا 😀 تسلملي طلتك ….. snow butterfly ان شاءالله اول مايطلع الفقع بجيب لكم صورهم تسلملي طلتك يالغلا ….. خراب السفينه تسلملي طلتك ….. بنت الثريا والقمر هههههههههههههههه ان شاءالله القرع مع الفقع والمطازيز تسلملي طلتك

  45. MoHaMmAd هههههههه ايه دايما البدو يستغربون اننا ناكله تسلملي طلتك …. ريم هههههههههههه ياحبي لقلبك تسلملي طلتك …. زكية عبدالعزيز خلاص تعالوا اسوي لكم دروس بالطبخ

  46. آآآآآآآآآآي يابطني شهيتيني… أنا الصراحه محد معطين وجه يطلعن اتعرجن… بس من الطفاقه طلعت بالبرحه اللي جنب بيتنا ولقيت 11 عرجون

  47. ياااا هلا ومسهلا ببنت ديرتي.. يسلموو الاياادي ومشكووووره ….. ولا تنسين قبل الاحمديه فيه عرااجين …. 😀 ولهن طريقه حلوووه تصير زي البرووست …

  48. بنت البدايع اسلوبك رووووووووووووووعه وممتع مره اما عن الغرجون عمري ما شفته مع ان زوجي يوديني طريق سفر لمده ساعتين علشان الفقع ولا بعد عل فاضي شهتيني بصرااااااااااحه تنفعين تألفين كتاب طبخ مشكوووووووووووووره عزيزتي في انتظار جديدك

  49. والله مادري وشي العراجين بس زي ماقالت لاحوووووووووووول الله يرجك انتي واتعليق والله اني فاااااااااطسه ضحك شكل اللي جاب العيددددددددددد انتي ههههههههههههههههههههههههههههههههههههه هههههههههههههههههههههههههه ههههههههههههههههه اكمل الحرفين خخخخخخ ؟؟؟؟؟؟؟؟؟؟

  50. وجع يوجع بليس لاتعلمين بمحل العراجين علشان نحتكر الشغلة ياناااااااااس اللي يسال عن محل العراجين تراهن على طريق مكه وانت رايح يم حايل جنوب راس تنورة خخخخخخخ والله اللي لقوهن

  51. موضوعك رووووووووووووعه يابنت البدايع :D:D:D انا مااكل العراحين بس احب القطهن انواع الوناسه :$:$8) بس شكلهن يذكرن بشي …..B B B

  52. تسلمي اختي بنت البدايع فديت قلبك يابنت ديرتنا اسلوبك رائع ودمك خفيف الله يحفظك …. بروح الحق قبل يخلصوووووووه

  53. أولا موضوعتس يهبل . وش زينه بس السؤال قد صلحتوه مقلقل بزيت الزيتون ؟ يقولون طعمه شي ثاني ياللي بالرياض يقولون بخشم العان العراجين تصيح تبي من يلقطه من الارض ننتظر جديدك يابنت البدائع فجيبي لنا البدائع اللي يعدي عنتس

  54. ما شاء الله عليتس يــ( بنت البدائع ) على الصور والطبخ على طاري الطبخ باقي طريقة طبخ العراجين بالكبسة شكلتس نسيتي تحطين طريقة الكبسة

  55. :D:D ههههههههاي ياحليلكم انتم وعراااجينكم انا اموووت على تلقيطهن بس اكل

  56. ههههههههههههه ياحبيلتس :$ هالعراجين اشغلونا عندهن , والي يقول بالرس اكس بي B صااادز حتى البنات هناك يعرجنن 😀

  57. فــديـتـــك وفــديــت القــصمـــان وســوـوـواليـفــهــــمــ أقوووووول تدرين وشو أكثر شي عجبنــــي ؟؟!! خبـــــز الــســـلمـــــان اللي بالصــوـوـوـورة حـقــــت النتيــجـــــة

  58. يازينه زيناه وياملحه ملحاه وياطعمه طعمااااااااااااااااه يم يم يم اموت بالعراجين تسلم يمينك ياحبوبه بس خير انشالله تعب وهم ياكلوووووووووووون لا لا خلك قويه كولي الراااااااااس وعطيهم العصقول يعرمشونه ههههههههههههههههههههه شكلي طيران لنفس المكان بسوي(كبسة مكرونه) اخاف اروح للمكان مالقى الا احفيرات احفيرا بالعينهن هههههههه بالهنا والعافيه بس المره الثانيه اذا عرفتو مكان فيه عراجين خبرونا قبل الطهي والطبخ والطبيخ مو بس اتخلوننا تقاطر سعابيلنا ههههههههههههههههههههههههههه [img]http://www.free-salah.com/salah/pics/ke5s7j2ew9lb4c91yd6r.gif[/img]

  59. السلام عليكم احسنتي يابنت البدايع. حقيقة دعاية طيبة للعراجين ما حلمن به. بس هذي فرصتهن قبل ما يطلع الفقع. ومن جد منة خلال الصور باين انك ما شاء الله حريفة.

  60. وش ذا الفتنه اللي انتي مسويته الله يهديتس بس ..! بصراااحه المقلقل يشهوي حسبي الله على عدوانتس .. والمشوي بصراحه اول مره ادري عنه :$ بس الغالبيه اللي اعرفه ان العراجين تنحط مع المرقوق والمطازيز

  61. صراحه بدعتي في العراجين هههههههههههههههه الله يعطيك العافيه والله انا ماعرفه هل هو زي الفقع الزبيدي ولا يختلف شكرا………….

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

العراجين ،، وأحلى مقلقل لعيونكم

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول