الحب غربلني وغيّر احوالي !


يامن سأل عن حالي .. الحب غربلني وغيّر احوالي !
من شفتّها ونيّت وقلبي ناداني … يامدمن .. ياهوه .. تعال على شاني ؟
أرخيت له اذني وقلت هاه ( عاني ) .. قال العذاب اليوم وبكره تنساني !


هالابيات كتبتها وانا جالســ(ن) على طرف دريشتي المتكسمره واللي جالس كل يوم أطلّ منها على بيضتين لحمامه تروح وتجي في اليوم ثلاث مرّات عشان تطمّن على حال أطفالها .. !
وكل ماشفت هالبيضتين .. تذكّرت امي يوم انها تحمل باخوي الصغير وكل يوم تطق على راس بطنها وتقول بكره تطلع على وشّ الدنيا وتشوف اخوك المملوح !
ياليتني بيضه واشوف بابه .. وياليتني حزمه في ظهر عوده !
دريشتنا مُطلّه مُباشره على باب دحيّم .. ودحيّم هذا مرته سويّر وسويّر هذي تعلّق قلبي فيها من يومي صغير .. ومن يومي صغير وانا أردد ( سلامات يامعذّب قلوب الأحبّه .. أنت الهوى البارح وانا صديق اليوم ) !
على طاري خربشاتي هذي .. أحسّ أني اليوم مستلج حبتين ونص .. وكل هالكلام المذكور آنفاً والداشر مُستقبلا والمُستحيل حالياً كتبته في غمضة عين يوم اني شفت سويّر تنزل من سيّارة دحيّم العراوي .. كانت راكبه ورى ( لأنه عيب عندنا في الديره أن الحرمه تركب قدّام .. لزوم تركب ورى .. وزوجها يتلطّم ) << عادات ما أنزل الله بِها مِن سُلطان ! 
المهم يوم انها نزلت إلا وتنزّل معها كيسـ(ن) كبير وغرشتين تيم .. وهو عاد شايلن معه شبك حمام لأنه رايح للسوق العصر .. ! 
ويوم اني شفت ذاك المنضر .. إلا وابدى اتخوبص ويجيني المغص وتذكّرت ملفاتي القديمه وفليّت شريطي المترهّل وتذكّرت ذيك الليالي السود والكشّة المنفوشه !
حوّلت وخذت لي فنجالين قهوه وثلاث حبّات من نوع سكّري ذاوي وجلست مع الوالده وعيوني غدت حمْرن من الونّه .. صبّرتني الوالده .. وقالت : ياولدي .. الدنيا عبْر .. وتراها ممر .. وباتسر بنشوف لك وحده أبرك من سويّر ألف مرّه .. واطلق منها وشرط انها تعثى في بنات الديره وتقول خذاني الرجْل الكفو وانا استاهله .. !
ياولدي مالك ومال الحُبْ .. الحُب غيّر احـــوالك وخلاك مثل دجاجتـ(ن) لعبتن فيها الانفلونزا .. ياولدي شف اصابع رجليك ( عاد انا طمّنت اشوف اصابع رجلي ) شفها تقول أعواد اسنان من دقّها .. دقّت حالك هالمصايب .. !


ياولدي ارحم حالك .. وترى سويّر يقولون عجز الحاره أنها متكدّره مع دحيّم .. وانها كل يومــ(ن) تطلع للسطوح تنضّف عشّة الحمام وتعبانه ليل نهار ! 
ياقلبي يامدمن .. رح لسالم وتعشّ انت وياه .. وسولف انت واياه بغيـر ( الحُبّ ) سولفوا عن أزمة الأسهم وانها سبب في زيادة عدد المستشفيات النفسيه .. !
سولفوا عن كيفية الإنماء الوطني .. حاولوا تفكوّن رموز التصريحات الأخيره لمدير الصندوق العقاري .. وأمّلوا خير أن الورثه يجيهم طفسة ارض باطراف الديره !
سولفوا عن مُشكلة زيادة المهور وأنها سبب لتفشي الأمراض الجنسية وكثرة رقص الشباب عند الاشارات وتسكّع البنات في شوارع الحوامل ! 
سولفوا ياولدي عن السياسه عشان أفارقك سبع سنوات وافتكّ منك ومن غثى حبّك لسويّر .. ! 
رح طسّ ياوليدي عن وجهي .. ورح شف البيضتين اللي فوق على دريشتك .. إحتمال وحده منهم فقّست !
يجيب الله خير !

:: مدمن شاهي ::


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الحب غربلني وغيّر احوالي !

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول