الجزء (2) من قصة المهجول مع المطوع


بسم الله الرحمن الرحيم
——————-
السلام عليكم
صباح الخير يا شباااااب .. كيف حالكم ..
………………………….

— اللي ما قرأ الجزء الأول يروح يقرأه علشان يفهم …
————————————–

— قبل ما نبدأ نحب نذكركم بالأسئلة الثلاثة اللي طرحها المطوع على المهجول ,,
وهي :
1- وشلونك مع الصلاة ؟
2- وشلونك مع القرآن ؟ ومتى آخر مرة قرأته ؟
3- وشلونك مع والديك ؟ تطيعهم وتحترمهم ولاتعصيهم أبد ولا ؟؟

نبغى كل واحد يوقف معها وقفة ويسأل نفسه ويشوف نفسه فيها,, ويحاسب نفسه عليها
———————————-
طبعا السالفة الأولى انتهت عند مطعم ماما نورة لأن المهجول كان مطفر وداج ذاك
الوقت وراح يتعشى مع المطوع ,, وطبعا انتم تذكرون انه فاتته الخشة وراح الوقت
عليه وما راح ولا حضر ذيك الليله …,,
———————————-
طيب اخلص علينا تراك ابلشتنا !!!
>>طيب طيب .. سم هالحييييييين نكمل القصة ….
——————————–

— يمكن نطول شوي عليكم ,
واعذرونا على التأخير , وسامحونا مرة ثانية لو عصبنا وشدينا شوي عليكم ….

المهجول :
شف عاااااااد يااااااااا مطوع : التأخير وبكيفك ما لي دخل فيك ,, بس لا تقعد
تهاوش وتعصب ..!!

المطوع :
طيب إن شاء الله , اقوووووووول ترى توي معشيك بماما نورة , اسمع كلامي زين وخلك
رجل ..!!

المهجول :
هاه !! سم سم , طيب بالله واحد كوكتيل علشان نمخمخ معك زين ..

المطوع :
عطوه كوكتيل … وين وصلنا يا مهجول ؟

المهجول :
التفحيط وما التفحيط واضراره وفوايده وزي كذا ….

المطوع :
طيب بالله عطني أي فايده للتفحيط والهجولة ؟؟؟

المهجول :
الصراحه والخقيقة يا مطوع ما له أي فايدة ابد ..!

المطوع :
طيب , ليش تهجول وتفحط …؟؟

المهجول :
هو يعني الصراحة علشان هو إذا كان هو موجود يعني ولا كان هو ….!!

المطوع :
وش تقوووووووول انت !!! …؟؟ وضح كلامك , ما فهمت شيء !!

المهجول :
يعني … يعني .اقولك هو .. علشان … لعيووووووووونه …

المطوع :
لعيونه !! كيف يعني ؟ ممكن تفهمني ؟

المهجول :
ابلشششششش بالمطوع ,, كيف نفهمه الآن . يا مطوع مالك ومال الامور هذي ؟؟

المطوع :
وش دعوه ,, قل لي ترى عادي (( توي معشيك يا ……!! )) ايوه وشو ؟؟

المهجول :
لعيونه يعني ذاك وذاك اللي بالي بالك ما غيره اللي هذاك يوم شفته هناك ..!!

المطوع :
ايييييييييييييييييييييه قل كذا الحين فهمت… ,

إلى الآن –حسبي الله عليك– وانت كذا !!
يا ولد انت شيبت وكبرت ,, والرجال طلع شنبه وانت ……!!
يا اخوي يا حبيبي … فكر بالامر زين ترى ما يستاهل كل هذا ,,
يعني تغضب الله وتفعل لحرام علشان ترضي فلا وعلان ..,!!!
يا اخوي ترى الله يشوف كل شيء ,, انت ما تستحي من نظر الله إليك …!!!
بالله عليك هذا شيء طبيعي ولا مرض ..!! راجع نفسك وفكر زين … !!
بالله عليك تقدر تفتخر عند ابوك والرجاجيل والشيبان بالشيء هذا ولا تستحي ؟ هاه
!!!

المهجول :
يا مطوع شوي شوي لا تعصب علينا …. تكفى ..

المطوع :
ليش ما اعصب بس انت لا تزعل علي ,, الحق حق وانا اخوك ما ينزعل منه …!
طيب شف هذا خويك (( لعيونه )) ….
— بينفعك يوم القيامة ؟؟؟
— بيزيد حسناتك ويدخلك الجنة ؟؟؟
— بيبعدك عن النار ؟؟

المهجول :
لا والله ما ظنيته يامطوع … يمكن العكس

المطوع :
طيب شف : تخيل انه هذا — لعيونه — أخوك !! ترضى له ؟ , ولا تخيل انه ولد عمك
ولا قريبك !!!
أكييييييييد ما ترضى .. طيب انت ما ترضى ,, ترى بعد حتى الناس ما يرضون لعيالهم
مثلك !!
ولا تقول لي هو راضي !! وحتى لو كان راضي ,, أهله ما يرضون اكيد مهما كان — حط
نفسك مكانهم —

طيب خلنا نكون صريحين اكثر .. : انت بعدين اذا تزوجت – إن شاء الله – تخيل
وافترض انه جاك ولد – ما شاء الله – حلو ومزيون … أنت ترضى انه كل يوم مع
واحد (( لعيوووونه)) ؟؟ والعالم يدورون عنده وانواااااااع الهجوله حوله ؟؟ !!

المهجول :
لا لا لا لا لا ,,
أنا ما أبي ولدي يصير مهجول , أبيه يصير عاقل ويحفظ القرآن…
وما أبيه يمشي مع أي واحد تعبان ابد , أبي ولدي ناجح في الدراسة ومتفوق … ما
أبيه يصير مثلي …!!!

المطوع :
طيب أنت أنت أنت لازم تغير نفسك الآن الآن ,,
وبعدين أنت إلى متى مع ((لعيونه )) وكل شيء لعيون (( لعيونه )) ..!!
يعني أنت تتوقع انك بتصير على طول كذا !! ولا هو يعني بيقعد لك كذا دايم صغير
على طووول و ما ارح يكبر وينتبه ويدري أنه خطأ وعلى خطأ وكل شيء صار خطأ
..وبعدين يكرهك ويمكن الآن هو يكرهك ما تدري ..!!

— انت ما عندك عزة نفس ؟؟
— انت ما عندك كرامة ؟؟
— انت ما عندك نية تتزوج وتستقر مثل العالم والناس ؟؟ وتترك عنك هالخرابيط هذي
؟

المهجول :
ياااا مطووووع يااااا ناااااس يااااا عاااااااالم ياهوووو (( أنااا
تعباااااااان )) ..!!

المطوع :
يا اخوي انت تعبت نفسك وطعت الشيطان وابعدت عن الرحمن , ومشيت بطريق المعاااصي
والحرام . .. وعصيت والديك .. واهملت الصلاة .. انت اللي خالفت الصواب وتركت
الهدى والرشاد ….. انت خربت نفسك بنفسك ..

المهجول :
اللي خربني أصدقاء السوء -خوياي- , انا كنت عاقل .. بس هم السبب …!!!

المطوع :
انت اللي مشيت معهم , ليش أصلا تصادقهم , ليش تمشي معهم , وش لقيت من وراهم ؟

المهجول :
لقيت : الهجولة والاغاني والتفحيط و ………!! و أحيانا نسرق !! و …….!!
ووو ..!!!

المطوع :
طيب كل هذي تنفعك يوم القيامة عند ربك ؟؟؟

المهجول:
أكيد لالالالالالالالالالا , بالعكس يمكن تهلكني ..!!

المطوع :
أجل هج وانحش عنها قبل ما تموت وانت عليها ..!! وبعدين اسمع الحديث هذا :
(( يحشر المرء مع من أحب )) ؟؟

المهجول :
كيف ؟ ما فهمت ؟ وضح يا مطوع ..

المطوع :
يعني انت وش ودك وش تبي بيوم الحشر مع من تحشر ؟
1– مع الانبياء والصديقين والعلماء والشهداء والصالحين والمؤمنين .؟
2– ولا تبي مع المغنين والممثلين والدشييييييير و و و ؟

المهجول :
لا والله ودي مع القسم الاول .. اكيييييييييييد ..

المطوع :
اكيد تبي تحشر معهم ؟ طيب ليش ما تخليهم هم قدوة لك ؟ وليش ما تعمل مثلهم ؟
وليش ما تمشي بطريقهم ؟
.. اللي يحب أحد يسوي زيه ويقلده ويمشي بطرقه اكيد .. , .

المهجول :
إن شاء الله ,, بس انت يا مطوع خوفتني !!

المطوع :
لازم تعرف ولازم تدري .. اليوم دنيا وبكرا آخره ,, اليوم عمل بدون حساب وبكرا
خساب بدون عمل !!
وبعدين ما راح ينفعك إلا عملك الصالح …

المهجول :
يعني رأيك بلا هم بلا غم بلا (( لعيونه )) يعني : الهجه يا ولد .. ؟

المطوع :
اي والله تكفى .. علشان تنجو وتفتك من المعاصي والاغاني والحرام والذنوب
والسيئات ..
وترتاح وتريح نفسك من الهموم والغموم …

المهجول :
طيب ابغاك يا مطوع توصيني وتنصحني ؟

المطوع :
— خلك دايم مع الرفقه الصالحة اللي يدلونك على الخير ويعينونك عليه …
— اترك عنك الحرام والمعاصي والاغاني قبل ما يموت قلبك ..
— حافظ على الصلوات في أوقاتها بالمسجد ..
— انتبه لوالديك ولا تعصيهم ابد ..
— اقرأ القرآن دايم ..
— اسمع الاشرطة المفيده
— واوصيك بكثرة الدعاء والاستغفار ..
–وتوكل على الله …
–ولا يهمك أحد ..

وعلى طاري الأشرطة :

هذي بعض الأشرطة المفيدة :

أولا : القرآن الكريم :

1- الفرائد .. للقارئ : ناصر القطامي .
2- فذكر بالقرآن من يخاف وعيد .. للقارئ : ياسر الدوسري مع الشيخ : خالد
الراشد.
3- ماجد الزامل , محمداللحيدان ..

ثانيا : المحاضرات :

1- أشرطة الشيخ خالد الراشد كلها جميلة جدا ..
2- أشرطة الشيخ الدكتور عبدالمحسن الأحمد أيضا كلها جميلة جدا ..
3- أشرطة الشيخ سليمان الجبيلان وخالد المشيقح وسامي المحيميد …

ثالثا : القصائد :

1- أشرطة الراوية : محمد الشرهان .. (قصص وقصائد ) ..
2- ونة .. لــ ناصرالراجح .
3- دمعة خفوق .. لــ ناصر الراجح .
4- نمر بن عدوان لــ المرشدي ..
5 – الدار …لــ السكران .

رابعا : الأناشيد والمنوعات :
1- مباشر 1 , مباشر 2 .
2- حورنيات 1 – 2 – 3 .
3 – المقناص .
4- وغيرها كثير ..
– أشرطة أبو عبدالملك , وأبو علي ..

المهجول :
جزاك الله خير …

——–
المهجول عرف انه طريقه مسدود ..,,
وعرف انه على خطأ ..,,
وعرف انه يمشي بطريق الشيطان ..,,
طريق ما يرضي الرحمن ..,,

عرف انه يمكن يجيه الموووووووت بأي لحظة ..
عرف ان الدنيا ما تسوى ..
عرف ان فيه شيء اسمه :
(موت وقبر وسؤال وبعث وحشر وحساب …. )

وبالاخير تاااااب وتعدل وصلح وزانت اموره …
والحمد لله ..

أسأل الله العظيم أن يهدي شباب المسلمين .
وأن يردهم إليه ردا ً جميلا .
آمين …

—–

والسلام عليكم ورحمة الله وبركاته …


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الجزء (2) من قصة المهجول مع المطوع

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول