الجزء الثاني _مواقف حصلت لي !!


مرحبا (اقين) يا اعضاء .. كيفكم .. ان شاء الله بخير …
قبل ما أكمل المواقف ابتكلم عن بعض الايميلات اللي جتني بخصوص مشاركتي الاولى فيه واحد سألني عن سبب وجود المشرفة في القاعة ؟؟ وليش نستأذن منها اذا جينا نطلع ؟؟
انا اقولك السبب :
لأن عدد طالبات القسم تجاوز 300 طالبة ..تخيل هذا العدد في قاعة وحدة !!
لازم يكون فيه مشرفة عشان تضبط البنات لأن (بعض) البنات مثل الاطفال تقعد تتكلم وتضحك وتسولف مع هذي وذيك وتزعج البنات المجتهدات وتزعج الدكتور نفسه .. واحيانا الدكتور نفسه يرفض انه يلقي المحاضرة بدون ماتجي المشرفة وتسكت البنات .. وبرضو اذا ماصار فيه مشرفة ماراح تلاقي احد في القاعة الا القلة من الطالبات المجتهدات .. يجون يوقعون الحضور ويطلعون يتمشون بالكلية ..
وليش نستأذن من المشرفة !!.. هذا لان بعض البنات يطلعون ولا يرجعون فلذلك لازم يستأذنون منها وتاخذ اساميهم عشان اذا مارجعوا تحط لهم غياب باقي المحاضرة ..
اتمنى اني اكون جاوبت ولو على جزء بسيط من تساؤلاتك..
 
نرجع لمحور حديثنا ميب سهلة الصيرفي
 
كراج الكلية !!
هذا بعد ماتخرجت من الثانوية العامة رحت اسجل بالكلية بس يالله لحقت على التسجيل لأني جيت بآخر يوم
وكانت الكلية فاضية تماما من الطالبات مافيه غير الاداريات وكلهن جالسات يتقهون ويتحلن بغرفتهن
المهم طقيت الباب وماعطوني وجه اسمع لجتهن يسولفون وطقيت مرة ثانية وماعندكم احد
قلت هذولي مايفيد بهن الطق بنعومة هذولي يبيلهن رجف برجلي .. وارجد الباب بأقوى ماعندي لمين فتحوا لي الباب ..
قالت خير قلت معي ملفاتي ابسجل !!
قالت صح النووم .. ليش ماجيتي قبل ؟
قلت تبين تسجليني ولالا ؟؟ قوية
قالت أي قسم تبين ؟
قلت كذا وكذا
قالت اجل انتصي نص ساعة على بال ماتجي راعية القسم !
قلت ليه وينها هي ؟
قالت رايحة تلعب مصاقيل .. وانا وش يدريني وينها !!
قلت طيب ..وطلعت
قعدت اتمشى بالكلية على بال ماتخلص النص ساعة ولأني اول مرة اشوف الكلية
المهم درت المباني كلها وضعت من كبرها .. وقعدت ادور بالساحة لقيت باب كبييييييير مفتوح على ساحة كبييييرة ورحت لها ولقيت فيه باصات كثيييرة وقعدت اتأمل واقول نفسي ياكبرها ذي الكلية حتى باصاتهم من داخل (كل هذا وانا كنت اتمشى فيه وكنت لابسة عادي تنورة وبلوزة بدون عباية)
وبينما انا غارقة في تأملاتي احلى يالتأملات
شفت رجال يمشي طلع من بين الباصات انهبلت انا وش مدخله هذا بالكلية !!
واناظر من الجهة الثانية واشوف بااااااب كبير مفتوح على الشارع .. خفت وبعد برهه اكتشفت اني بكراج الكلية !!وبعدما توغلت فيه ..
جلست اركض ساعة ابرجع للمكان اللي جيت منه ..بس ماش الباب بعيد .. وبعد ربع ساعة وصلت للكلية وانا الهث وخايفة لا يحسبوني بنت كذا ولا كذا ..
مايدرون اني دبشه الله بارضه مادري وين ربي حاطن ..
المهم رجعت للأداريات قلت وين اللي بتسجلني ؟؟
قالوا تعالي بكرا اليوم ماتقدر تسجلك !!
—————–
عاد الحين كل ما مريت من عند باب الكراج القاه مسكر .. اول فاتحينه لأنه عطلة ومافيه بنات.. مادروا ان فيه بنات على وجيههن مثلي !!
 
مواقفي يوم كنت بالابتدائي
يوم اني صغيرة كنت جريئة .. اذكر مرة كانت مدرسة الدين تشرح لنا عن وجوب قص الاظافر وانه مايجوز الواحد يخلي اظافره تطول اكثر من اربعين يوم .. وقالت عشان كذا المدرسة يسوون تفتيش على الاظافر لأن الاظافر وسخة ومدري ايش ..
جيت قمت انا وقلت لها طيب انتي اظافرك طويلة ليش ماتقصينهم ..!! وكانت هي لسى عروس .. جت تلخبطت واحتارت ماتدري وش ترد علي ووشلون تشرح لي .. بعدين قربت لمي وقالت اذا كبرتي تعرفين ليش ..
 
وكلما اتذكر الموقف هذا ارحمها والله بصراحة احراج ..يعني البزران وش بيفهمهم الاشياء هذي ..
 
من هي بنته !!
هذي يوم كنت بأولى ابتدائي .. كانت تسألنا المعلمة عن اسمائنا ويوم قلت لها اسمي .. استغربت وشكت انها تعرفني .. قالت امك منهي بنته ؟؟
انا : بنت امي هيلة !!(اقصد جدتي)
وفطست المعلمة من الضحك .. وراحت نادت المعلمة من الفصل الثاني وجت لم وقال امك منهي بنته ؟؟
قلت : بنت امي هييييييييييييييييييييييييلة
وقعدوا يضحكون وانا مادري ليه يضحكون .. على بالي يضحكون على اسم جدتي جلست اناظرهم باستحقار !!
 
حولا
هذي مرة معلمتنا كانت غايبة وتعرفون بزران اذا صار عندهم حصة فاضية انواع الازعاج جت الوكيلة وعينت علينا عريفة===( كح كح ياقدمها اييييييه الله يرحم ذيك الايام ) تكتب اسماء اللي يزعجون عشان يعاقبونهم .. عاد البنات خوافات .. وعلى طووول تأدبن .. وطول الحصة ساكتين ولا حركة جت العريفة انقهرت ودها تكتب اسم وحدة من البنات بس ماقدرت كلهم مؤدبين ..جت حطت عينها على وحدة حولا (مسكينة خلقة حولا ) قالت لها عدلي عيونك ولا ابكتب اسمك !! والبنت تقول وشو قالت اقولك عدلي عيونك احسن لك .. قالت عيوني كذا .. عاد رحمت البنت والله قلت للعريفة حرام عليك تدرين انها حولا من زمان (قصدي خلقة بس كنت صغيرة ماعرفت اعبر ) المهم سكتت العريفة وماقدرت تقول شي ..
ومن بعد ما دافعت عنها صرت انا وياها صديقات ..
واذكر مرة من لقافتي سألتها : شلون تشوفيني وحدة ولا ثنتين !!
مافهمت البنت قالت شلون ؟؟
جيت اشرت على بنت مرت من عندنا وقلت لها: تشوفين ليلى وحدة ولا ثنتين ؟؟
قالت وحدة !!
 
———————
انتهت مواقفي .. اتمنى انها تكون اعجبتكم .. تحياااتي العذبة …باااااااااي
 
لحظة
 
بعد مشاركتي الاولى تفاجئت بكثر الاضافات .. ورفضتهم كلهم معليش لحد يزعل
بس رجاء لحد يضيفني ..
 
يالله بااااااااااااااااااي


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الجزء الثاني _مواقف حصلت لي !!

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول