استادنا والصلاة + بندر والهيئة + منتدياتنا


السلام عليكم ورحمة الله وبركاته
الله يمسيكم بالخير
كلكم صحة تكونوا أن أتمنى وعافية في >> رتب ماسبق
>>يقاله جاب شي جديد والله من البياخة

أشكر كل من تفاعل معي في إيميلي السابق سواء كان تعقيب شخصي عالإيميل أو على الموضوع في القروب أو حتى من شرفني بقراءة الموضوع
شكراً أد الدووونيا الواحد من جد تنفتح نفسه يكتب شي جديد

أول كنت لافتحت اي إيميل لأي عضو في القروب كنت أقول يالله لهالدرجة المقدمة صعبة؟
والله كنت استغرب لكن استغرابي أختفى يوم جلست أفكر في المقدمة من الظهر إلى العصر ماأدري وش أكتب
ماينلامون صرت أشيل هم المقدمة قبل أفكر أكتب الموضوع

المهم ماعلينا

عالبركة فوز الزعيم وهاردلك لجماهير الشمس كما يحبون أن يسمون أنفسهم وبسبب إستدعاء طاري أضطريت إني أشوف المباراة في بيتنا وفي الصالة تحديداً
الشاهد ياجماعة إنو عُرض لقطات للملعب وقت أذان صلاة العشاء والجماهير ماشاء الله مالية الواجهة المقابلة للمنصة من الأعلى ومن الأسفل يعني عدد مو هين بصراحة وأغلبهم أكيد من الشباب الله يحفظهم
محسوبكم مو شاايب ولامطوع عشان يتكلم ذا الكلام لكن ..
خلونا نتكلم جد
أنا حضرت الملعب كذا مرة ووالله اللي يطلعون يصلون عدد قليل جداُ جداً مقارنة بالعدد الحاضر للملعب وإذا أخذنا في بالنا إن اغلب الحاضرين في مباريات كبيرة زي كذا راح يوصلون الملعب قبل المغرب بفترة ماهي قصيرة ..
يعني فيه صلاة مغرب وصلاة عشاء الله يخلف

بيجيك واحد مدرعم ويقول :عادي أبصليها كلها لاطلعت!
وانا أقول :الملعب أو المباراة صدقني ماهي عذر عشان الواحد يترك الصلاة وكلنا يعرف قصة الأعمى الذي لم يأذن له الرسول صلى الله عليه وسلم حيث كان عذره أنه لم يجد قائد يقوده للمسجد (لاحظ) ولم يأذن له

الرسول صلى الله عليه وسلم بحجة أنه يسمع النداء ..

بيجيك واحد ثاني ويقول : المقاعد زحمة وأخاف أطلع أصلي ثم أرجع ما ألقى مقعدي أو حتى مقعد مكانه حلو عشان أتابع المباراة !
ياأخي الله لايبارك في مقعد ولايبارك في مباراة بتمنعني عن صلاتي ..
أو إذا هي على المقعد أغلب الشباب يجون للملعب قروبات يعني إثنين وفوق فما في مانع التناوب واحد يحجز والثاني يصلي مع إن الملعب فيه 70000 مقعد ولاراح تفوتك المباراة إن شاء الله..

أذكر مرة في إعتزال يوسف الثنيان صلينا أنا وحوالي 10 من الشباب في سجادات حول الأستاد (على فكرة الأستاد على ماأعتقد لايوجد به مسجد أو مصلى والموجود فقط سجادات متناثرة في المنطقة الخارجية وحاولت البحث عن تقصيل لتصميم الملعب
لكن مالقيت فيها اي معلومة تفيد إنه يوجد مصلى للجمهور في الملعب
المهم إنا صلينا وبعد الصلاة أكتشفنا إن القبلة خطأ (محسوبكم وربعه مصلين شرق)) لأن السجادات مفروشة على غير سنعها
والحمد لله تنبهنا وأعدنا الصلاة

والله ياجماعة من الحرة اللي فيني يوم اشوف المشهد ..
تصير غصب عليك تكتب أو تحسس نفسك إنك سويت شي وودك يسمعونك كلهم أو عالأقل يحسون بالشي اللي جالس يصير .
أنا على عكس هذا المشهد أنبسط لما أشوف مثلاً ناس في طريق سفر أو حتى طرق مافيها محطات ولامساجد يوقفون ويتوضون ويصلون يعني مايترك صلاة ولايحاول يدور لها أي عذر – الله يتقبل صلواتنا وصلوات المسلمين ياارب –

فكلامي والله كله جاء من باب الدين النصيحة للحديث قول النبي صلى الله عليه وسلم : الدين النصيحة قالوا: لمن؟ قال: لله ولكتابه ولرسوله ولأئمة المسلمين وعامتهم صدق رسول الله صلى الله عليه وسلم

بعض الشباب يتهاون في مسألة الصلاة ويربط ذلك بمعاصيه كالتدخين أو سماع الأغاني أو أو .. ويقول هي خاربة خاربة ليه نصلي ؟ لكن معروف إن مافيه أي أحد معصوم من الخطا وعلي وعليك إننا نترك معاصينا لكن خذ ببالك إن الصلاة هي عمود الدين فإن صلحت صلح دينك بإذن الله وإن فسدت فسد دينك أجارنا الله وإياكم
جعلنا الله وإياك من المخلصين في أقوالهم وأعمالهم
اللهم آآمين


خطبة صلاة الجمعة

كنت في محادثة في الماسنجر مع أحد الشبان في المرحلة المتوسطة وكان الحديث بعد صلاة الجمعة مباشرة في الرياض ولفت نظري وجوده عالمسن مع إن الصلاة حسب كلامه لم تقم في مدينته
دخلت في حوار معه عشان الصلاة وصلاة الجمعة بالذات
نص المحادثة بعد إذنه طبعاً


خلوكم من كلامه اللي فوق وركزوا على (من كثر مايعيده حفظته) لأن أتخذت المحادثة كمدخل لكلامي

خطب صلاة الجمعة هل أصبحت قريبة من واقعنا ؟
هل الخطباء في خطبة الجمعة يتكلمون في مواضيع أو قضايا تهم الناس أو تلامس واقعهم ؟
هل أصبحت مواضيع الخُطب مواضيع مكررة ومعروفة للكل كـ الصلاة والصدقة وو ؟

لاأقلل من أهمية هذه المواضيع ولكنها أشياء يعرفها جميعنا ..
أعرف كذا واحد يجي للجمعة عشان الصلاة بس وعذره وشو ؟ يقول مواضيع الخطب مكررة

متى يتكلم علمائنا وخطبائنا عن مشاكل الشعب؟
مثل الغلاء المُفتعل في جميع السلع .. التفحيط الذي ذهب ضحيته الكثير من شباب الوطن .. الواسطات وحكمها إذا كان فيها مضرة الغير .. التسلط في العمل من قِبل الرؤساء والمدراء ؟
نريد طرح مثل هذه المواضيع .. مشاكل المجتمع .. مشاكل الشباب .. مشاكل هي حديث المجالس والإجتماعات .. نريد حلول لمشاكلنا على ضوء شريعتنا السمحة .. نريد طرحها من قِبل العلماء والخطباء بحكم إنهم أعلم مننا في هذه الأمور
ماقصدت شي من الموضوع والله لكن مقصدي محدد وواضح للجميع إن شاء الله


المنتديات

وماأدراك ماالمنتديات
بعيد عن سالفة الإرسال الجماعي والتعدي على خصوصيات الغير وإزعاجهم عن طريق إرسال الرسائل يعني مايصدقون يلقون لهم إيميل ويضمونه لهم وخذ إرساليات ومواضيع ومدح فيهم وحنا وحنا وعندنا ..
وبعيد كمان عن حُب البعض (وللأسف) التشهير وكل ما قرا له أي شي عن السعودية قام وشب الدنيا وخذ ياتشهير وفضائح على قولته وإلحق وألا ماتلحق ..
خلونا نشوف الصور من بريدي ونتكلم

أهم شي تلحق قبل يحذفون الموضوع

وأهم شي كلمة (بالصور) بس الله العالم إنها عاامل جذب رهيب

أهم شي ذا السعودية ماتفوتهم
حسبنا الله ونعم الوكيل عليهم

أوووهـ

ماأقدر أعلق بصراحة

ولاتفوتكم فضائح السعودية
جال ببالي عدة أسئلة بعد رؤية الصور وعناوين المواضيع :

هل مواضيع الجنس هي مايُرغبون فيه متصفح الإنترنت حتى يتكرم بزيارة لهم ؟
هل يحملون فكرة سيئة عن الإنترنت بأنه منبع لما يروجون له وعن رواد الإنترنت بشكل عام بإنهم شغوفون ومتلهفون لنفس جنس مواضيعهم التي يُحرجون لها ؟
هل فعلاً مايرونه من إقبال على هذه المواضيع جعلهم يضعونها -أي المواضيع الإباحية- متصدرة لقوائم نشراتهم البريدية ؟
مادرينا والله !
حمانا الله وإياكم من كل مكروه وأبعدنا عن الشرور .. إنه سميع مجيب


بندر والهيئة

ياجماعة يوم شفت هالرد فطست ضحك
وتذكرت أبوي يسولف علي عن شايب في القرية -الله يرحمه وأموات المسلمين- لاتضارب مع أي أحد وأنجلد مايستحي يقول إني أنجلدت بعكسنا ألحين تلقى الواحد مابقى في جسمه مكان لضربة يد ويقولك سدحتهم


يالبى قليبك يابندر

وفي الختام

أسأل الله أن تعم الفائدة على الجميع
وأشكر إدارة القروب إتاحة الفرصة ونلتقي في إيميل قادم إن شاء الله

تحياتي
عبود

[email protected]


تعليقات 30

  1. موضوع بصراحة وأنا اقراه ارتاحت نفسي كثيييراً ,, لأن مازال هناك ناس يحرصون على الصلاة ويغاروون على انتهاك حرمتها ,, الصلاة أساس الدين ,, الله يجزاك الجنة والفردووس الاعلى على موضوعك

  2. الايميل رائع رائع من اول كلمة الى اخر كلمة .. بالفعل طرحت مواضيع كل واحد أهم من الثاني .. انا اؤيد كلامك كله اخوي ..سواء عن الصلاة والا مواضيع خطب الجمعة ولا المنتديات كل اللي اقوله جزاك الله الف خير ولا حرمك الاجر على التذكير وجعل الجنة مثواك ان شاءالله …

  3. بصراحه يا جماعه اذا شفت مقطع مكتوب عليه (( سعوديات في مرقص أو سعوديه في وضع مخل أو سعوديه في …… الخ )) والله اني استانس ياخي تحس أنهم ودهم يشوفون السعوديات هاللي يسمعون فيهم ولا يشوفونهم من سترهم (( طبعاً مو الكل ونسأل الله أنهم يكونون الكل )) تحس أنهم ودهم يطلعون البنت السعوديه داعره بس ما قدروا فمالهم إلا أنهم يشبعون غرائزهم بأوهامهم وأحلامهم وخيالهم الله يحفظ السعوديه سواء كانت الوطن أو البنت وسلامتكم

  4. بصراحه اعجز عن شكرك على هذه الكلمات التي والله انها تثلج الصدر وتحسس الواحد ان الدنيا لسا بخير مدام فيها شباب من امثالك الله يوفقك وجميع شباب المسلمين

  5. يعافيك ربي ..عسي يكون لموضوعك ..باب في فتح عيون ..الغافلين والمتغافلين ..وجزك ربي خير

  6. والله من قلب اثلج صدري موضوعك ..اسلوبك حلو و سلس وبسيط كل النقاط اللي تكلمت عنها تمس واقعنا الحالي ..وخاصه الصلاه وخطب الجمعه جزاك الله خير ورزقك من خيري الدنيا والآخره جعل الفردوس نزلك ووالديك وجميع المسلمين

  7. سٌعدت جدا بقراءة الاميل بارك الله فيك والله يثبتنا واياك على طاعته

  8. الله يجزاك خير والله أونس شي إذا جتك نصيحة بأسلوب بسيط ومن شخص تحس أنه عايش الجو معك الله لا يحرمك الاجر

  9. والله اول مرة اشوف واحد يوعظ وباسلوب مشوق وفيه اقناع وخفة دم…اتوقع فعلا لو تواصل على هالاسلوب بتنشهر وتكون مجدد في مجال الوعظ….بس اذا انشهرت لا تنساني…

  10. جزاك الله خيرًا وبارك الله وفيك وكثر من أمثالك .. مقال أكثر من رائع خصوصًا ما يتعلق بتهاون أخواننا من الشباب بالصلاة.

  11. منور الموضوع بك ياغاالي والله مثل ماقلت في الموضوع من حرتي على اللي أشوف طلع اللي بقلبي شاكر لك مرورك وإطرائك تحيتي لك eman الأروع مرورك وردك وإن شاء الله تعم الفايدة على الجميع ولاحُرمتي الأجر إن شاء الله أهلاً وسهلا 🙂

  12. الله يعطيك العافيه ياأخوي عبود على الموضوع الاكثر من رائع والله انك صادق في اي كلمه تقولها ويكفيني فخر انك اخوي واخيرا لاتحرمنا من جديدك اخوك ..فيصل .

  13. والله يأخي أنك جيت عالجرح ومن أول هالموضوع في نفسي وشايله همة أروع موضوع يصلني اليوم ماشاء الله تبارك الله والله العظيم تجيني مواضيع بتأرف لا والمشكله لما بنجبر وبدخل بأول ياليتني مادخلت قمه الغباء والسخافة بحطوا خبر وبهز الدنيا وبعدين بألولك إشاعه والله العظيم شيء بزعل بس الله يهدينا ويهدي شباب المسلمين إل كل خير وأشكرك مره تانيه عاموضوع الرائع

  14. و الله ياخوي اثلجت صدري الله يثلج صدرك بالجنة قول ’’مين و السامعين و الله موضوعك خلاني ارد غصب و هاذا اول رد لي بالقرووب لان موضوعك ديني و انا كلش يهوون الا ديني و حمستني الله يوفقك و يجعلها في ميزان حسناتك يارب

  15. اشكرك ياعبدالله ….مواضيع رائعه ونصيحه جدا شدتني الله يصلح لنا ولكم النية والذريه ..((والله يرزقك الزوجة الصالحة ))

  16. السلام عليكم ورحمة الله وبركاته بصراحه يا الغالي موضوعك ممتاااااااااااز جدا جدا >>>وما فيك حيله….هع هع اي والله انك صادق يا خوي هذا هو الحاصل وما نقول الا حسبي الله ونعم الوكيل ان كان فيه تقصير فهو منا مو من غيرنا ….وجزاك الله خير …وانشاء الله انه يكون هالموضوع في موازين حسناتك باذن الله.

  17. اولا ,,احب اشكرك يالغلاعلى ماقلت..والله ان قلبي يتقطع لمااشوفهم في الملاعب لاصلات ولاعباده ولامن سمع ولامن درى..وهذاإذاسمعو نداء الصلاة الله يخلف على امة محمد..وهذي وهي إمباراة عاديه والانديه السعوديه يقومون المبارات بعد الصلاة يعني ماله عذرفي وقت لاقامة الصلاة..اجل وش نقول لاصارت إمبارات خليجيه اودوليه..ميدري اصلاإنه في صلاة مانقول إلااللهم مقلب القلوب ثبت قلوبناعلى طاعتك..اللهم اميين..وبالنسبه للخطب والله في بعض المساجد يمسكهاشباب والله يفتح النفس لامن خطبه ولامن صوت ولامن مواضيع ماشاء الله عليهم الله يزيدهم من فضله..واناارفع صوتي معك إذاكان الامام اوالخطيب ماهوقادرعلى تلمس حاجات ومشاكل الشعب وامورهم دنيويه واخره يترك المجال لغيره مويجيك شايب والله يحياتي هويتكلم وينبح صوته وجايب كل جهده ويخلص والله مادري وش يقول.. اوووووووه نسيت التعليق على المقدمه..بالنسبه للمقدمات المواضيع اغلب مافي القروب مشاء الله مقدماتهم تتغلب على موضوعهم والله إني انبسط لمااقراء وانا توي في المقدمه اجل لمااجي لم الموضوع..والله الواحد يفتخرويرفع راسه لما يشوف شباب مثل غيرتك ويحس انه في الدنياخير وبالنهايه لااملك غيرهذا الدعاء((اللهم بشره بروحن وريحان ورب راضن غيرغضبان))

  18. ياحبيلك على هالإيميل يارب ياكريم ارزق كاتب هالإيميل من خيري الدنيا والأخره وحقق له اللي فيه الخير

  19. موضووووع تووووووووووووحفه اسلوبك رائع وسلس في نقاط هادفه ويشد الواحد انه يكمله للاخير دمت مبدعا ^_^

  20. الله يجزاك خير ويبارك فيك على هذا الشعور ولو أن كل واحد من الشباب أحس بهذا الشعور وقام بدعوه زملائه واصدقاءه بالنصح والموعظة الحسنة لتغير الحال بإذن الله ..

  21. بصراحة اول شي اشكرك عالموضوع الاكثر من الرائع اجبرتني اكتبلك تعليق واشكرك بصراحة ارتاحت نفسيتي بعد ماقرات كلامك بالتوفيق والله يهدي شبابنا …

  22. بسم الله الرحمن الرحيم السلام عليكم ورحمة الله وبركاته جزاك الله خير الجزاء أخي الفاضل وبارك الله فيك والله صراحة من أول مثل هذا الموضوع نريد طرحه لأنه بصراحة لفت انتباهي أنا وأخي قبل عدة أعوام في مدينة جدة بالتحديد مبارة الإتحاد والأهلي وكانت في يوم الجمعه ونقلت بعض الصحف المحلية صور لبعض المشجعين وهم يصلون الجمعه وواحد منهم خطيبهم وإمامهم وذالك دليل على أنه لاتوجد مصليات في الإستاذ الرياضي كافية لهذه الجماهير وانا أحمل المسؤولية رعاية الشباب وأقلهم أتقوا الله في أنفسكم ولتأتوا بالحل المناسب ولاكن لا أطرح مسؤليتي على رعاية الشباب ولاكن على بعض الجماهير هداهم الله وهدانا وأرجو من هيئة الأمر بالمعروف والنهي عن المنكر التدخل لإجاد حل مناسب وذلك بمخاطبة رعاية الشباب والله المستعان وبارك الله فيك وجزاك الله خير الجزاء

  23. بصراحة جزاك الله خير لانك ذكرت موضوع مهم جدا لم يتكلم فيه احد , ويحتاج الى جرأة , واكثر الناس لم يتكلم فيه لا نعلم ماهي الاسباب وفقك الله والى الامام

  24. جزاك الله خيرا على هذا الطرح لقد قرأت الموضوع كلمة كلمة الى آخره راااااائع

  25. اشكرك اخي على هذا الموضوع الرائع ونتمنى من المسئولين بنادي الشباب ينتبهوا لهذة النقطة وياليت يكون وقت الدخول بعد اداء صلاة المغرب على الاقل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

استادنا والصلاة + بندر والهيئة + منتدياتنا

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول