احبها واعشقها بعد


بسم الله الرحمن الرحيم
السلام عليكم ورحمة الله وبركاته
 
كيف الحاااال جميعاً؟؟؟
اتمنى الكل بصحه وسلامه
 
بصراحه ادري من زمااان عن القروب
واحس اني مغبره
بس صارت ظروف وسافرت الرياض ورجعت
ماصدقت اطب الرياض الا رجعت بعد يومين
ياحرااااام
 
اقولكم في بداية الموضوع
والله
الريــــاض جنه
ومحد بيحس الا المغترب
انا صارلي 9 سنين برا
وبالاجازات اروح الرياض
بس احلى وقت وقت الاجازات
بتقولون حر
والله عسل على قلبي
ووووووه ياناسها عسسسسسل والله
بما اني منهم فأكيد عسل اكثر<<<ترى كف
لا بس جد فيه ناس يقولون
<<<بدت تقلدهم
((
يااربيييه مااطيق الحررر يووه متى يجي السيف<الصيف يعني> اسافر اوروبا))
ويوم رحت اسجل يومين بالجامعه
يوووووه يوووووه
<<مسكينه باقي شوي وتبكي
من جد اااه يازين ريحتها
يازين حرها
يازين شوارعها
يازين ناااااااااسها
يازين كل شي فييييها
 
احـــــــــــــــــبــــــــــــــــــــــها واعشــقها
 
تدرون مرره سوينا تحدي انا واختي
بس ولا وحده سوته
بتقولون مجانين ماعليه
بس ماسوينه
قلت لاختي اذا نزلنا من الطياره بأبوس الارض
قالت والله عاااادي وانا بعد
بعدين وقت الصدق ماقدرنا والله
بعدين يودونا مستشفى شهااار على طول
بعبايتهم ويبوسون في الارض مجانين اكييد
ههههههههه
اشووووا الحمدلله خفنا نسويها
 
المهم سووري طولت بالمقدمه
بس من جد محد عارف عن غلاة الرياض بقلبي الا اللي حاس مثلي ومغترب
 
المهم
قعدت افكر وش اكتب ووش اقول … وقعدت اعصر مخي
من كم شهر احاول اخترع موضوع ماطلع شي
 
وباقول لكم موضوع قد قلته لكم لكن بأقول السبب اللي خلاني اكتبه لكم
وقبل مااكتبه ليش فكرت هالتفكير
 
تذكرون سالفة الموقع الاجنبي
اللي قلت لكم اني دخلت افيد وطلعت مستفيده
كان بعنوان قصتي القصيره

هذا رابط المنتدى الاجنبي للي يبيه لان ماتوقعت الطلبات عليه كثيره تفضلوا
اضغط هنا
 
طبعا كل شي له قصه
وقصتي ماجات من عدم
انا بأقولكم السالفه
عشان فعلا تعرفون ان حنا فعلا مقصرين
اختي ماتشترك في منتديات عربيه كلها اجنبيه
واشتركت بمنتدى عربي واحد بس عشان شغله
عندها ناس اجانب بالماسنجر
وعندها واحد روسي اسمه اندرو وعمره 18
((
طبعا فيه ناس بيستنكرون هالشي انا بصراحه احسه شي عادي لانه ماعرف هي مين ولا صار شي حرام))
المهم مره كنت جالسه عندها
ومدري ليش هالمره بس ولا انا مااهتم
فتح سالفة الاسلام
طبعا بأكتب السالفه لكم والكلام اللي صار بيننا
((
بأحولها بالعربي الفصحى ولا تدققون بالكلام كثير))

اندرو:احس الاسلام دين جيد لكن احس انه لا يعطي المرأه حقها
اختي:لماذا؟؟
اندرو:لماذا لاتكشف وجهها ولماذا تتحجب ؟؟؟
اختي:انها لاتكشف وجهها للرجل الغريب لكن تكشف وجهها على الذين حرام انها تتزوجهم … واسمه محرم
اندرو:لماذا؟؟
اختي: (
طبعا ماقصرنا عطيناه موقع مكتوب فيه اساسيات الاسلام ليش الحجاب ومثل هالاشياء اللي يكون عالاجانب صعب فهمها)
 اندرو:شكرا سوف اقرأه كله … ولقد وضعته بالمفضله
اختي:سوف اقول لك مثال بسيط…عندما يكون هناك رجل وامرأتان وهناك امرأه شبه عاريه
وامرأه تلبس اللباس الشرعي … من منهم سوف يختار ليهاجمها ويعتدي عليها؟؟
اندرو:امممممممم سوف يأخذ المرأتين بكل الاحوال
((
طبعا صعب الاقناع لكن حاولنا))
اندرو:هل تعلمين لقد قرأت القرآن مره انه مثير للاهتمام…والاسلام دين جيد فعلا لكن لماذا لم يعطي المرأه حقوقها

انا واختي حاولنا نقنعه
وعطيناه اللي قدرنا عليه
ممكن غيرنا تفكيره بنسبة 45%
والان انا واختي ماندري عنه صراحه من كم شهر ماندري عنه
وفعلا انا اتمنى انه يسلم فعلا اتمنى هالشي من كل قلبي
 
بصراحه بعدها حسيت ان حنا مقصرييين تجاااه ديننا
وانه اقل شي انه ممكن نسويه ان حنا ننشره عن طريق النت

وعلى فكره
بصراحه واعترف وللاسف
احنا شعب كل ماتقدمنا بالسنوات لقينا نسبة الثقافه قلت
والاجانب كلهم احسن مافيهم انهم يحبون يقروون مررره يحبون القراءه
مهما تطوروا يظل الكتاب الصديق الدائم اللي مستحيل يتغير مهما كبروا

مو حنا
مثلا انا احب القراءه لكن مشكلتي لازم يكووون هدووووء عندي
زي مره كنت قاعده في احد الفنادق وقاعده تحت الشمس
يقال لي مشغووله ايه مشغوله اتشمس ولو
واناظر كل الاجانب يقروون كتب
انواع واشكال يقرون والله حتى البزران اللي يتشمسون يقروون
وانا اقول نفسي مشغوله …. ايه اتشمس هههههه

من جد دامنا ندري انهم يحبون يقروون ليش ماندخل ونوزع بهالمواقع
اللي مابكثر منها
وهم مايقولون لا
وهذا موقع سيرة الرسول صلى الله عليه وسلم
بعشر لغات اجنبيه
الموقع

وشوفوا الفلاش انا شدني كثييير وخاصه الاهات من جد بغيت ابكي من الصوت
 
وابي اضيف نقطه بسييييييييطه
تدرون ان حنا للاسف
بدو طاحوا في مريس
^^^^
سوري للبدو لايفهمون غلط وانا بدويه بعد
لكن اقولكم المثل لان من جد راكب على اللي بأقوله
حنا بشر ماصدقوا انهم يتطورون
ماصدقوا انهم يعرفون يسبوون
احيان ادخل مواقع
مثل يوتوب
واشوف ناس يسبون الاسلام
يجي واحد يقال انه مسلم
ياابن….ياللي فيك مايخطيك مدري وشو
واخر الكلام اللي خذ وخل منه
 
ياعاااالم
شلون تبون واحد يسلم وهذا هو المسلم اللي مفروض يكون قدوه يكون كذا اسلوبه
ماترضى على دينك صح
بس دايما اقول كل شي بالتفاهم يصير
خلكم قدوه زينه للغير
 
والله يهدي الجميع ان شاءالله
 
وبس خلص موضوعي لليوم
لنا لقاء اخر ان شاءالله
<<خلصي
ايه بغيت اقول شي
اتمنى الاضافات توقف
اللي يبيني بشغله
يرسل قبل ايميل بعدها يصير خير
 
وبس بأحاول مااقطع هالفتره بس نشوف الظروف
وفــ أمان الله


تعليقات 7

  1. اولا اشكرك اختي ميلاد كما تعودنا من مواضيع السابقه التنوع في المواضيع لكن في الاخير يصب في موضوع واحد الي هو خوفك على الدين وخاصه مع الناس الي عايشين برا النت زي ماهو فيه شر فيه خير واقرب مثل الي سويته انتي واختك والله يجازيكم عليه ان شاء الله اما سالفت الثقافه فانتي ضربتي على الجرج فالموضوع هذا زي ماقلتي الصغار يقرون يعني بدوا يقرون وهم صغار وحنا صغارنا مفلتين بالشوارع ميـــــــــــــــــــلاد في انتظارك’’’’’’’’

  2. وأحد مايعشق بلاده^_* شكرا لك ميلاد على الموضوع الحلو وهذرتك الحلوة 🙂 وياليتني أعرف للإنجليزي عدل كان ماقصرت 🙁 شكرا لك

  3. واللي ما يحب الحر وش يسوي :\ الله يقويتس يا بعدهم وابقى منهم .. ق4 هذا الشغل السنع و الله يهدي الجميع .. وأذكروا الله حميعاً

  4. فعلا يحبون القراءة ولو نفكر في السبب ((لأن القراءة زي الكبسه و الأكل عندنا بالظبط)) يعني عادة او غذاء يومي احيانا يسألون اسأله عن الاسلام دقيقه جداً ما تتخيل انهم يسألون ولا تنحرج من الجواب لانهم مستحيل يتفهمون لان طريقة تفكيرهم تختلف جداً ومسك الختام صدقتي يا حبنيلك يالسعوديه وحر السعودية …..مع السلامه قبل يشتغل الهوم سيك

  5. جزاك الله خير عالموضوع المهم ونشكرك عالتنبيه والتذكير باشياء يمكن الواحد يكون مشغول او لاهي عنها يحتاج من ينبهه لها والله يثبت عالايمان انتي واختك ويزيدكم واتمنى دوم تنبهونا على مثل هذه المواضيع انتو وغيركم ممن يقرا هذا التعليق وجزاكم الله خير

  6. السلام عليكم ورحمة الله وبركاته . الحقيقه طرافة الاسلوب أضفت على الموضوع جانب التغريب في القراءه . انا مستغرب من هالسؤال اللي لابد منه . يمدح الاسلام ويحزن على انه مايعطي المرأه حقها . بعدين المفروض وضحّتي له عدد حالات الاغتصاب والاجهاض اللي بالعالم ووين متركزّ مع السبب .بالنسبه للشاب اعتقد من وجهة (نظري) انك لما قلتي انه ماعاد له شوفه ولاشي انه ممكن كذا سوالف. اللي له رغبه أكيده ما يسأل عن المرأه لوحدها . تلاقينه يستفسر عن سر الخروج في الليل لصلاة الفجر . عن خطأ العالم في سب الرسول عليه السلام من قبل الدنمارك ومن معها .بما انك هناك . حاولي تسوين لك موقع خاص مثل السبيس . وحطي فيه المواقع اللي تعرّف بالاسلام .وفي بداية الصفحه مثلا يكون صوت قراءة قران بصوت الشيخ سعد الغامدي اللي ماشا الله راهن الكثير ممن اعتنقوا الاسلام انه سبب في إسلامهم وهذا كان في موقع صيد الفوائد اذا ماني غلطان . وكوني سبب معه .الله يثبتك في بلاد الغربه . والمعذره على الاطاله . وجزى الله صاحب الموقع خير الجزاء .

  7. الله يعطيك العافيه اختي كلامك جااااااااااي في الصميم.. والله يقوينا على فعل الخير والكتب والقراءة مهمه حيييييل واتمنى انشالله مثل مااستفدنا يوم وقرينا يجي اليوم اللي غيرنا مننا يستفيد دمتي اختي… اختك شندو

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

احبها واعشقها بعد

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول