رسائل المجموعة

أبحث عن رفيقة دربي

أبحث عن رفيقة دربي…..
أهلين لكل أعضاء قروب أبونواف المميز

وبعد
أكيد استغربتوا من عنوان الرسالة
فعلاً….أنا ادور على صديقة عمري اللي فرقتني عنها الايام بعد ما جمعتنا قبل سنوات
واليوم,بعد ما ضاقت بي الدنيا…ألجأ لقروب أبو نواف بعد الله تعالى..لأنه ببساطة أكثر القروبات تميزاً في الخليج والعالم العربي برأي الكثيرين, وكذا ممكن توصل رسالتي لصديقتي ورفيقة عمري اللي افتقدها اليوم اكثر مما مضى
أصدقائي اعضاء القروب المتفوق ابونواف,, نظراً لثقتي الكبيرة في نشاطكم وامانتكم راح اترك لكم هذي الرسالة حتى تنشرونها على أمل انها توصل في نهاية المطاف لصديقتي الغالية…وحتى لو ما وصلت لها عالأقل توصل لاحد من معارفها أو ربعها
أكيد تتسائلون…شلون ضيعت صديقتي بعد عِشرة سنين؟!..والى هالدرجة مقدر اوصل لها؟؟!….وانا بشرح لكم كل شي وفي النهاية كل اللي ارجوه انكم تساعدوني وتتعاونون معاي في سبيل اعادة البسمة لحياتي من جديد..لأني من فترة طويلة صايرة شخصية انطوائية ومزاجية, رغم اني كنت في الماضي بنت اجتماعية ومرحة مع الكل وفي كل الاوقات
تبدأ قصتي مع صديقتي الغالية يوم التقيتها صدفة في أحد المجمعات وهناك تعرفنا على بعض
كان عمري ذاك اليوم 17 سنة وكان عمرها هي 15…هي اصغر مني بسنتين
وصار بيننا مكالمات تلفونية كثيرة..ومع الأيام صارت صداقتنا اقوى…فصرنا ما نطلع الا مع بعض ولا نسولف الا مع بعض….صحيح كنت اقضي اوقات ممتعة مع بعض الصديقات الي اعرفهم غيرها…لكن كان معظم الوقت لها هي….كانت توأم روحي…واختي اللي ما جابتها امي
كنا ناخذ راي بعضنا في كل شي…ابتداء بطريقة اللبس وانتهاء بالمكان اللي بنروح له آخر الاسبوع
كنا نطلع مع بعض يوم اربعاء وخميس وجمعة…وفي الايام العادية تجيني او اجيها
صرنا ثنائي مرح ما يفترق ابد…لدرجة ان الكثير من البنات يحسدوننا على صداقتنا القوية
كنت أعزها..ولا زلت طبعاً…لا زال في قلبي لها شعور نبيل…لكن اعترف انها كانت تغليني اكثر…ما ترضى علي بأي سوء وتدافع عني في غيابي…وما أبالغ ان قلت انها كانت تعزني اكثر من اختها اللي قدي بالسن
والله لي ذكريات جميلة جداً لهالبنت الطيبة المخلصة
ذكريات كل ما أتذكرها والله لا إرادياً تنزل دموعي..وشلون ما ابكي فرقاها وهي اللي كانت جوهرة حرام الواحد يفرط فيها في زمن المصالح والماديات!!؟
أنا ما فرطت بها…الأيام فرقتنا وحرمتنا من بعض….وصبرت في البداية على فراقها..لكني اليوم افتقدها بقوة كل ما تعرضت لموقف سخيف من بعض صديقاتي اللي ما يتصلون بي الا لاجل مصلحة او مساعدة..وأحياناً ما يكون غرضهم مصلحة وخدمة..لكنهم يتصلون بي عشان يفضفضون ويطلعون كل اللي بقلبهم من هم وغم, ولما يجي الوقت اللي ابي افضفض فيه لاحد واطلع اللي مضيق صدري ما القى احد يفهمني..او يسمعني عالاقل…وهذا اللي يخليني اطلب الله انها ترجع لي من جديد
وعشان تفهموني اكثر راح اشرح لكم شلون ضيعتها في زحمة الهموم
بعد صداقة دامت بضع سنوات عانينا فيها من المشاكل بسبب غيرة البعض منا وحسدهم- من بعض البنات اللي كانوا يتبلون علينا عشان يفرقونا- وبعد ما تحدينا الكل بقوتنا وثباتنا واثباتنا للكل اننا فعلاً توأم مستحيل انه يفترق, فرقنا القدر هالمرة بعد ما عجزوا اللي حوالينا انهم يفرقونا
سافرت صديقتي الى لبنان (صديقتي سعودية المولد والنشأة..لبنانية الأصل والجنسية), سافرت مع اهلها كلهم, ابوها وامها واخواتها, وكانت هي كارهة فكرة السفر لو مؤقتاً لأنها متعلقة بالديرة اللي تربت فيها…لكن ظروف والدها اجبرتهم على الرحيل
انا فكرت انها بترجع مثل ما وعدتني….لكن مرت فترة طويلة…مرت ثلاث سنوات ولارجعت
كانت تراسلني من هناك بالجوال..وكلمتها انا كم مرة…وكانت تطمني بالبداية انها بترجع اكيد وانه باقي شوي وترجع للدمام….وفجأة انقطعت اخبارها…ولا ادري شاللي صار؟؟!….والمشكلة ان رقمها اللي كانت تراسلني منه ضاع مع شريحة جوالي اللي ضاعت……..والى يومكم هذا وانا ادور عليها…اسأل عنها…لكن محد عارف هل هي رجعت او للحين بلبنان..وشنهي ظروفها؟؟
يقولون انها انخطبت للي تحبه……فرحت جداً لاجلها…..وزعلت في نفس الوقت!…فرحت لانها خذت اللي كانت تحبه موت وتتمناه رغم انه ارتباطها به كان مستحيل….وزعلت لاني ما حضرت حفلة خطوبتها وانا اقرب الناس لها
مدري الحين شصار لها
هل هي للحين على ذمته لأن الموضوع كان مجرد خطبة..يعني ما صار عقد ولا شي….وهل هي عايشة بسلام ومرتاحة بعيد عن المكان اللي عاشت فيه طفولتها وصباها……………..وأهم شي هل هي تفتقدني مثل ما افتقدها انا اليوم؟؟؟
لمزيد من المعلومات عن صديقتي الغالية……يمكن احد من معارفها يقرا رسالتي ويوصلها لها..من يدري!؟..كل شي جايز في ظل هالقروب النشيط المثالي
اسمها "عبير عساف", عمرها الحين 20 سنة وبعد كم شهر تكمل الـ21 سنة
" للحين حافظة عيد ميلادك يا عبير"
متوسطة الطول
ناعمة وبيضاء البشرة
شعرها طويل وبالأصل اسود لكنها تصبغه اشقر بصفة مستمرة…"مدري اذا غيرت في شكله ولونه"!؟
كنا نشبهها بـ"جيري هالويل" عضوة فريق سبايس غيرلز سابقاً…."مدري اذا كانت للحين تشبهها أو غيرت بالستايل حقها وشكلها ككل"!؟
مرحة.. طيبة…وفية…مخلصة…كريمة…خلوقة…اجتماعية..وتحب تنكت!…"مدري اذا غيرها الزمن وصارت تحمل صفات اخرى"!؟
ماراح اطوّل عليكم اصدقائي الاعضاء…بس يبقى رسالة قصيرة ودي اني اختتم بها كلامي…وطبعاً بوجهها للغالية عبير
كنت احبك كثير…واليوم احبك اكثر واحس بقيمتك اكثر من قبل بعد ما عانيت بما فيه الكفاية من صداقات المصالح والنفاق والحاسدين
اتمنى انك تتصلي فيني اول ما تقرين رسالتي…طبعاً عن طريق الايميل هذا…لأن تلفون البيت تغير من سنتين وشوي..وجوالي القديم غيرته
أتمنى فعلاً ان رسالتي وصلت لك يا أغلى صديقة جمعتني بها الايام…..واتمنى قبل كل شي اننا نلتقي من جديد رغم المسافات والظروف
نلتقي عشان اخبرك باللي  سوته فيني الاقدار من بعد رحيلك عن حياتي..وعشان اقول لك اني اشتقت لك كثير واني محتاجة مثلك انسان صادق ومخلص اليوم اكثر من قبل
صديقتك المخلصة
غــــــــادة

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى